Aleanca për Ardhmërinë e Kosovës ka shprehur qëndrim se rruga e vetme për daljen nga kriza institucionale janë zgjedhjet e reja.
Në mbledhjen e kryesisë së kësaj partie është konstatuar se gjendja aktuale është alarmanete dhe situata kërkon veprime të menjëhershme.
“Kryesia konstatoi se gjendja aktuale në vend është alarmante, pa qeveri legjitime dhe pa funksionim të duhur të institucioneve. Kjo situatë e rëndë politike dhe institucionale kërkon veprim të menjëhershëm. Në këto rrethana, zgjidhja e vetme dhe e domosdoshme janë zgjedhjet e jashtëzakonshme, që qytetarët të rikthejnë legjitimitetin dhe besimin në institucionet e tyre”, thuhet në komunikatën e AAK-së.
Në këtë mbledhje si nisje për përgatitjet për zgjedhjet e reja janë miratuar kriteret për përpilimin e listës së kandidatëve për deputetë dhe nisjen e përgatitjeve në nivel të degëve për zgjedhjet e ardhshme.
AAK ka thënë se buxheti për vitin 2026 duhet të miratohet nga qeveria e re e dalë nga zgjedhjet.
“Aleanca për Ardhmërinë e Kosovës nuk do të jetë pjesë e asnjë procesi që e shkel Kushtetutën dhe e deformon rendin demokratik. Ne kërkojmë që buxheti i ri të miratohet vetëm pas krijimit të Qeverisë së re me mandat të plotë. Aleanca nuk do të lejojë që Qeveria në detyrë të uzurpojë kompetenca që nuk i takojnë më. Ne mbrojmë integritetin institucional dhe rendin kushtetues të Republikës. Vendi ka nevojë për një buxhet të qeverisë legjitime, jo të qeverisë në ikje. Kjo nuk është çështje teknike, por parimore: S’ka buxhet pa Qeveri. S’ka vendimmarrje pa mandat. S’ka demokraci pa respektim të Kushtetutës”, thuhet në deklaratën e miratuar nga Kryesia e AAK-së.
