Tahiri pas mbledhjes së kryesisë së Kuvendit, tha se në këtë takim kishte disa kërkesa siç është reforma pensionale e paraqitur tash e një kohë nga deputeti Shemsedin Dreshaj.
“E dyta ka të bëjë me reformat pensionale. AAK nuk e mbështet asnjë reformë nëse nuk miratohet ligji i ngritur nga Shemsedin Dreshaj që lidhet me personat të cilëve nuk u njihet stazhi për një ditë qoftë në arsim, në polici, në shëndetësi, etj.”, tha Tahiri.
Ai tha se ka kërkuar nga kryesia e Kuvendit që t’i drejtohet edhe një letër presidencës çeke të Parlamentit Evropian si dhe të gjitha parlamenteve të shteteve anëtare të BE-së lidhur me liberalizimin e vizave në Kosovë.
“Në kryesi e kam ngritë një kërkesë që Kuvendi përmes kryetarit t’i adresohet edhe presidencës çeke edhe të gjithë kryeparlamentarëve të vendeve anëtare, me kërkesë që lidhet me një mosveprim me liberalizimin e vizave për qytetarët e Kosovës.
Heshtja e Kuvendit nuk është e drejtë dhe për këtë arsye e ngrita këtë çështje që të ketë adresim serioz duke e ditur që vetëm në seancën e fundit u miratuan 9 marrëveshje ndërkombëtare, 7 prej tyre marrëveshje me BE-në”, tha Tahiri.
Tahiri tha se si kërkesë tjetër në kryesi e ka paraqitur edhe atë për zhbllokim të mjeteve për investime kapitale për komunat e Kosovës, si dhe miratimin e Ligjit të Pagave.
Tahiri tha se me procedurat që po shkon, Ligji i ri i Pagave nuk ka gjasë që të hyj në fuqi më 1 janar të vitit 2023.
“Ligji i pagave ka përfunduar procesin e diskutimit publik dhe ende nuk vjen për miratim në Kuvend. Mosardhja e këtij ligji nënkupton shtyrje edhe për 1 vit të zbatimit të tij. AAK kërkon që ligji të vjen sa më shpejt në Kuvend në mënyrë që zbatimi i tij të filoj më 1 janar të vitit 2023 e jo 1 janar 2024. Me këtë procedurë, ky ligj nuk ka teori me hy në zbatim më 1 janar të vitit që po vjen”, tha Tahiri.
Përndryshe, Besnik Thairi e përshëndeti thirrjen e seancës parlamentare me pikat e papërfunduara të rendit të ditës për të enjten.
