Aleanca për Ardhmërinë e Kosovës ka mbajtur mbledhjen e radhës të Kryesisë, ku është diskutuar për procesin e brendshëm zgjedhor si dhe për zhvillimet aktuale politike në vend.
Sipas njoftimit të partisë, procesi zgjedhor i brendshëm është duke u zhvilluar sipas planifikimit dhe me një përfshirje të gjerë të strukturave partiake. Ky proces pritet të përfundojë në nivel dege më 10 maj, ndërsa do të kulmojë më 24 maj me mbajtjen e Kuvendit të Përgjithshëm Zgjedhor. Në këtë kuvend do të zgjidhen kryetari dhe strukturat e reja drejtuese të Aleancës.
Gjatë takimit, Kryesia ka diskutuar edhe për situatën aktuale politike në vend. AAK vlerëson se mungesa e rezultateve në qeverisje dhe mungesa e një agjende të qartë zhvillimore dhe bashkëpunuese po e shtyjnë vendin drejt zgjedhjeve të jashtëzakonshme.
Sipas tyre, këto zhvillime janë shqetësuese dhe kërkojnë reflektim të menjëhershëm në skenën politike.
