Aleanca për Ardhmërinë e Kosovës ka vendosur të mbështesë kandidatin e Lëvizjes Vetëvendosje , Arsim Ademi, në balotazhin e së dielës për kryetar të Vitisë, ku ai është në garë me Sokol Halitin e Lidhjes Demokratike të Kosovës.
Këtë e ka bërë të ditur kandidati i AAK-së për kryetar, Labinot Bislimi, i cili në zgjedhjet e 12 tetorit kishte marrë 2.89 për qind të votave.
“Pasi u përafruan vlerat, idetë dhe programet. Pasi e morëm vendimin brenda strukturave tona. Sot në mëngjes nënshkruam marrëveshjen e koalicionit në nivel të degëve dhe i zgjatem dorën njëri-tjetrit me kandidatin për kryetar, z. Arsim Ademi. Ky koalicion është rrjedhojë e natyrshme e situatës dhe e vet pozicionimit tonë karshi të keqes së Komunës së Vitisë që me emër thërrasim Sokol Haliti,” ka shkruar Bislimi në Facebook.
Tutje ai shtoi: “Aleanca Dega në Viti nuk ka qëndruar asnjëherë indiferente ndaj proceseve dhe nuk ka pasur asnjëherë pozicion neutral përballë të keqes. Situata e tanishme kërkon guxim, mobilizim dhe pozicionim. Ky koalicion e shpreh edhe njëherë guximin tonë për të qenë pjesë e proceseve politike; për ti ndihmuar dinamikat shoqërore dhe për ti shtyrë përpara vlerat, idetë dhe projektet e nevojshme për qytetarët e komunës tonë.”
Në rundin e parë të zgjedhjeve, Sokol Haliti kishte marrë 38.01 për qind të votave, ndërsa Arsim Ademi 33.46 për qind.
