Grupi Parlamentar i AAK-së ka kritikuar Qeverinë për planifikim jo të duhur të buxhetit për vitin 2024.
Në një konferencë për shtyp, deputeti Pal Lekaj, tha se asnjë amendament i propozuar nga opozita nuk është marrë parasysh, madje janë injoruar edhe agjencitë e ndërmarrjet publike.
“Ne si AAK, grupi parlamentar ka bërë kërkesa apo amendamente që shkojnë në favor të qytetarëve, por janë injoruar tërësisht. Asnjë amendament nuk është shqyrtuar, analizuar dhe apriori i kanë hedhur poshtë. Një nga to është rruga Dollc – Gjakovë. Nëse vizitohet ajo rrugë, shihet se ka mbetur në gjendje të mjerueshme ku qytetarët kanë vështirësi në lëvizje dhe i dëmtojnë automjetet e tyre. Po ashtu, tërë vitin kemi apeluar te qeveria, kemi debatuar në kuvend për sa i përket koeficentit në vlerë prej 129 euro. Fare nuk është shqyrtuar dhe është injoruar totalisht”, tha Lekaj.
Më tej, ai përmendi edhe çështjen e pensioneve, ku tha se kanë kërkuar nga qeveria që ato të rriten nga 100 në 120 euro, por sipas tij, edhe kjo kërkesë është injoruar nga qeveria.
“Rritja e buxhetit për stadiumin e Suharekës. Janë kërkuar 20 milionë dhe është aprovuar buxheti prej 100 mijë euro. Të gjitha amendamentet e komunave të opozitës si tërësi janë hedhur poshtë”, tha Lekaj.
Ndërsa, shefi i deputetëve të kësaj partie, Besnik Tahiri, tha se shumica parlamentare e VV-së, buxhetin e Kosovës e ka kthyer në buxhet të partisë së vet.
“Mbi 22 komuna nuk ka asnjë projekt të ri. Të gjitha amendamentet e komunave, të gjitha janë refuzuar. Kjo na tregon për një arbitraritet. Ky subjekt politik ka nevojë për opozitën vetëm atëherë kur i ngushtohet në aspektin e sigurisë në veri apo çështjet kur lidhen me votimet e 2/3”, tha ai
