Deputetja boshnjake në Kuvendin e Kosovës, Duda Balje, i është bashkuar Aleancës për Ardhmërinë e Kosovës (AAK), duke mundësuar kështu formimin e grupit parlamentar të kësaj partie.
Lajmin e ka konfirmuar për Tëvë1 për medie zëdhënësi i AAK-së, Kushtrim Xhemaili, i cili ka bërë të ditur se pas bashkimit të Baljes, Aleanca tani i ka gjashtë deputetë, aq sa kërkohen për krijimin e një grupi parlamentar në Kuvend.
AAK në zgjedhjet e fundit kishte garuar në koalicion parazgjedhor me Nismën Socialdemokrate, nga ku së bashku kishin siguruar tetë ulëse në Kuvend. Megjithatë, pas zgjedhjeve, Nisma u shkëput nga Aleanca, duke e lënë partinë e Ramush Haradinajt me pesë deputetë dhe pa grup parlamentar.
Për të plotësuar numrin e nevojshëm, më herët AAK-së iu kishte bashkuar deputeti Adem Hoxha, por më pas ishte përjashtuar nga partia.
Tani, me aderimin e Duda Baljes, e cila në zgjedhjet e 9 shkurtit kishte garuar me subjektin e saj SDU dhe kishte siguruar një mandat deputeteje me 0.32% të votave, AAK rikthen statusin e grupit parlamentar në Kuvendin e Kosovës.
