Edhe një kërkesë nga Policia e Kosovës për bashkëpunim të qytetarëve për identifikimin e një gruaje u bë këtë javë.
Ky institucion po kërkon ndihmë që të gjejnë këtë person që dyshohet të këtë kryer veprën shpërdorim të pasurisë së huaj.
E ky nuk është rasti i vetëm i publikimit të fotografive në këtë formë.
Se pse e bën ekspozimin e personave të dyshuar tregon vet ky institucion.
“Policia e Kosovës bën publike kërkesa për bashkëpunim me qytetar me fotografi në platformat e saj si Webfaqe dhe Facebook vetëm me urdhër të prokurorit kur këto kërkesa vijnë nga zyrat për informim në DRP (Drejtoritë Rajonale të Policisë) si dhe njësi të nivelit qendror dhe pasi të arrihet qëllimi i publikimit të fotografisë për identifikimin e personit të kërkuar, atëherë bëhet edhe largimi i publikimit nga platformat e Policisë së Kosovës”, thuhet nga Policia e Kosovës.
Por, eksperti i sigurisë, Bedri Elezi kërkon që institucionet e vendit të kenë kujdes në ekspozimin e personave të dyshuar.
“Në rastin konkret, sidomos për veprat të cilat nuk janë vepra të rënda kujtoj që duhet të ketë një kujdes për ti ekspozuar personat apo figurat të cilat janë të dyshuar apo ka një dyshim të bazuar sepse nëse të njëjtit do të dalin të pafajshëm për pretendimin që ka në rastin konkret Policia apo Prokuroria, atëherë në mënyrë të drejtë do të dëmtohen qytetarët”, tha Elezi.
Kurse nga Agjencia për Informim dhe Privatësi kanë treguar nëse publikimi i këtyre fotografive është shkelje e privatësisë.
“Policia e Kosovës publikimin e fotografive e bënë pas një kërkese të cilën ia lëshon prokurori i shtetit. Në anën tjetër kemi kodin e procedurës penale i cili e autorizon prokurorin e shtetit të jep urdhër policisë në raste kur nuk mundet të identifikohet një person që fotografia të publikohet me qëllim të identifikimit”, tha Arbian Arifi.
Nga Agjencisë për Informimi dhe Privatësi thonë se shpeshherë kanë kërkuar nga Policia që pas arritjes së qëllimit të bëhet largimi i fotografive.
