Opozita ka vazhduar bojkotin që e filloi një ditë më parë.
E kjo gjendje sipas tyre do të zgjasë derisa të formohet Komisioni Hetimor për menaxhimin e krizës energjetike.
Të mërkurën, këtyre iu bashkuan edhe nga Lidhja Demokratike e Kosovës.
“Nuk do të marrim pjesë në asnjë nismë legjislative për shkak se na u është mohuar një e drejtë e vetme si opozitë për komisionin hetimor. Tani kanë arsyetime dhe ka ndryshuar kualifikimi për 42 kontratat dhe që është keqpërdorim. Qytetarëve iu kanë borxh për këtë ndryshim radikal për 360 shkallë. Një institucion tjetër i bllokuar është autoriteti i konkurrencës”, tha Hykmete Bajrami, deputete e LDK-së.
E nëse do të përpiqen të gjejnë një kompromis, nuk janë përgjigjur të mërkurën nga partia në pushtet.
Ndërsa analisti politik, Arton Demhasaj, për këtë çështje, thotë se pozitë e opozitë, duhet të arrijnë shumë shpejt një kompromis.
“Në njëfarë mënyrë kemi një bllokadë që nëse VV nuk pranon në asnjë mënyrë më lëshu pe sa i përket krijimit të komisionit dhe opozita nuk pranon pe sa i përket bllokadës, kemi një situatë që kuvendi ka me funksionu me vetem një parti politike dhe pakicat”, tha Demhasaj.
Nëse kjo gjendje zgjat, sipas Demhasajt, rrezikohet funksionimi i mirëfilltë i punës në Kuvend.
“Në rast se mungon opozita në kuvend, atëherë krejt ligjet dhe politikat që hartohen janë vetëm zëri i partisë që është në pushtët dhe aty mungon kritika dhe zëri i partive opozitare, kështu e minon funksionimin e kuvendit dhe demokracinë”, shtoi Demhasaj.
Ndryshe të martën vendin e partive opozitare, e zunë disa nga deputetët mazhorancës.
Raporti i gazetarit Fidan Zejnullahu.
