Edhe këtë fillimvit, Prishtina u përball me ndotje të ajrit.
Si pasojë, kryeqyteti edhe u fut në listën e qyteteve më të ndotura në botë.
E kjo ndotje ka bërë që të ketë shtim të numrit të pacientëve për kontrolla.
Këtë e tha edhe pulmulogu, Flamur Marku që sipas tij, ky problem shkakton telashe më së shumti të pacientët që janë me sëmundje kronike.
“Shkakton një përkeqësim të gjendjes që tani shihet për shkak të lagështisë edhe për shkak të ndotjes së madhe të ajrit shihen si mjegull që shkaktojnë një përkeqësim të gjendjes së përgjithshme e sidomos një përkeqësim të funksionit të mushkërive ku kemi rënie të nivelit të oksigjenit dhe si pasojë shkakton një kollitje më të madhe të pacientit, një lodhje që e rrit kërkesën për ndihmë mjekësorë apo për tretman mjekësor”, ka thwnw Marku.
Mirëpo, kjo ndotje, sipas profesorit të shkencave të mjedisit, Sami Makolli nuk vjen si pasojë e përdorimit të fishekzjarrëve.
Por problemi qëndron diku tjetër.
“Arsyeja më bazike është që ne kemi shumë ndotje e ne nuk kemi zgjidh problemin e energjisë problemin e termocentraleve problemin e komunikacionit dhe djegies së karburanteve të ngurta. Ajo që e vështirëson pikërisht nëse pyetni pse këto ditë është çështja ndryshimet klimatike. Tani që masat e ajrit përmbysen dhe mjegullat bien poshtë në qytet gjithmonë ndotësit mbesin në ajër që njihet si smogu dimëror që vije prej termocentraleve dhe ndotësve tjerë”, ka thwnw Sami Makolli – profesor i shkencave të mjedisit.
Por ndryshe thonë nga Instituti Kombëtar i Shëndetësisë Publike së Kosovës.
“Kjo periudhë e vitit karakterizohet zakonisht nga përkeqësimi i cilësisë së ajrit, i cili mund të ketë efekte të dëmshme për shëndetin, veçanërisht për gratë shtatzëna, fëmijët, të moshuarit dhe pacientët me sëmundje kronike. Ditët e fundit, Prishtina është renditur ndër qytetet me ajrin më të ndotur në botë, kryesisht si pasojë e përdorimit të fishekzjarrëve gjatë festave të fundvitit, numrit të madh të veturave në trafik dhe përdorimit të lëndëve djegëse për ngrohje në amvisëri”, thuhet nga IKSHPK.
Ndryshe nga ditët e kaluara, të premten në tabelat informuese njoftohej se gjatë ditës cilësia e ajrit është vlerësuar si e kënaqshme.
