Janë bërë një javë që kur kryeministri Albin Kurti ishte urdhëruar të paraqitej në Prokurorinë Speciale të Kosovës për të dhënë dëshmi.
Por as këtë herë ai nuk përfilli urdhërin e Gjykatës, për çka i hapi rrugë masave tjera që mund të mirren ndaj tij si dënim me gjobë e arrestim.
E sipas avokatit Naim Rudari, Kurti po tenton që të përfitojë politikisht me këtë.
“Ai ftohet për t’u intervistuar për vartësit e tij të cilët besohet se kanë keqpërdorur detyrën zyrtare dhe në këtë rast ka nënshkrime të kryeministrit që ata me gjasë kanë deklaruar se kanë vepruar me urdhër të kryeministrit dhe sido që të jetë është shumë, shumë e lehtë që përgjegjësia penale nëse kanë bërë vartësitë e tij me dije të kryeministrit apo me urdhër të tij mund të kalojë edhe të vet kryeminstri… Në asnjë formë nuk mund t’i ikë, nëse ka prova dhe e dëshmojnë provat atëherë ai mund të përfshihet edhe si i dyshuar në këtë çështje”, thotë Naim Rudari avokat
Këtë e sheh si të mundur edhe Gzim Shala nga Instituti i Kosovës për Drejtësi.
“Sipas ligjit një mundësi e tillë ekziston dhe në raste tjera kemi parë në raste të shumta që kjo ka ndodhur. Madje ka ndodhur ka raste kur ka ndodhë edhe e kundërta ku nga i pandehur ka marrë cilësinë e dëshmitarit. Kjo varet nga rrjedha e hetimeve, dmth kur fillon një hetim i caktuar nuk nënkupton tutje se ai hetim mund të zgjerohet edhe ndaj personave të tjerë po eventualisht edhe ndaj veprave të tjera”, shprehet Shala.
Sipas tij, Kosova është vend i sundimit të ligjit andaj mosparaqitjen e tij e konsideron si shkelje e këtyre parimeve.
“Dmth ajo çfarë kërkohet nga një qeverisje e mirë është bashkëpunimi i Qeverisë dhe suportimi për aq sa është i nevojshëm dhe aq sa është i mundshëm për sistemin e drejtësisë dhe në asnjë rrethanë veprime të tilla, mos paraqitje të tilla përkundër që ka ftesë. Definitivisht se kjo është para se të jetë në kundërshtim me ligjin, është në kundërshtim me parimet e sundimit të ligjit dhe parimet e qeverisjes së mirë”, thotë ai.
Prokuroria Themelore në Prishtinë por as Gjykata ende nuk kanë treguar hapat e mëtejmë që do të merren ndaj kryeministrit Kurti.
