Me certifikimin e rezultateve të zgjedhjeve të 9 shkurtit të enjten, përfundimisht ky proces përfundoi.
Kësisoj, pas kësaj date edhe Qeveria aktuale kalon nga qeveri me mandat të plotë në Qeveri në dorëheqje.
Por, a duhet dhënë dorëheqje ministrat dhe kabineti qeveritar aktual pas këtij veprimi nga ana e KQZ-së?
Gzim Shala nga Instituti i Kosovës për Drejtësi, thotë se ligji i ri për Qeverinë ka krijuar mangësi në këtë situatë.
“Për shkak se mandati fillon që nga momenti që ai jep betimin e tij në Kuvendin e Republikës së Kosovës jo nga momenti i certifikimit. Dhe këtë situatë sigurisht është dashur që ta adresojë Ligji i miratuar për Qeverinë e që fatkeqësisht këtë nuk e ka bërë. Në këtë situatë ku jemi tash dmth duke pasur parasysh se një dispozitë e tillë nuk është zbatuar në atë mënyrë asnjëherë deri më tani, interpretimi dhe zbatimi duhet të bëhet në përputhje me frymën dhe logjikën e interpretimit kushtetues në frymën e funksionimit adekuat të institucioneve qeveritare”, vlerëson Shala.
E Vullnet Bugaqku nga Instituti Demokratik i Kosovës thotë se në bazë të ligjit, ministrat që kanë siguruar ulëse në Kuvend duhet dhënë dorëheqje.
“Pra është obligim ligjor konform nenit 26 paragrafit 1 i Ligjit për Qeverinë që anëtari i cili është i zgjedhur si deputet duhet të japë dorëheqje… Sepse edhe Kushtetuta e Kosovës edhe Ligji për Qeverinë e ndalon të themi ashtu që njëkohësisht një person t’i ketë statusin edhe të ministrit edhe deputetit, kjo është për hir të transparencës që mos të ketë konflikt në mënyrë të dyfishtë të mandateve për një periudhë të shkurtë kohore”, thotë ai.
Sipas tij, pas certifikimit të rezultatit zgjedhor të gjitha vendimet e Qeverisë janë të kontestueshme.
“Po që se ndodhë nesër ose pasnesër apo gjatë ditëve të tjera të javës, kjo Qeveri mblidhet prapë dhe nxjerrë vendime janë në kundërshtim me nenin 31 të vet Ligjit për Qeverinë atëherë ato vendime normalisht që mund të cilësohen si vnedime jo ligjore dhe jo kushtetuese, mirëpo edhe mund të kontestohen por aktualisht si palë të autorizuar që mund ta bëjnë kontestimin e venidmeve të tilla janë ose Presidentja ose Avokati i Popullit, Kuvendi nuk është funksional dhe nuk mund deputetët me i dërgu ato vendime të Qeverisë në Kushtetuese”, vlerëson Bugaqku
