Lëvizja Vetëvendosje duket se ka ndryshuar strategji në këtë fushatë zgjedhore.
Kësaj radhe, eksponentët kryesorë të partisë kanë zgjedhur një ton më të butë ndaj rivalëve politikë në paraqitjet e tyre publike.
Po ashtu, anëtarët e partisë më të madhe në vend nuk po i bojkotojnë më paraqitjet në disa media, siç ka ndodhur në të kaluarën.
Analisti politik, Agon Maliqi, thotë se kjo strategji është përdorur edhe më herët nga Lëvizja Vetëvendosje.
Sipas tij, partia ka kuptuar se po humb një pjesë të votuesve që nuk e mbështesin polarizimin ekstrem.
“Përdorimin e kësaj strategjie e kemi parë edhe më herët. Vetëvendosje, nga një parti e njohur për gazin lotsjellës në Kuvend dhe protestat e dhunshme, filloi procesin e moderimit në vitin 2019, të cilin e thelloi edhe më tej në vitin 2021. Prandaj, mendoj se VV ka nuhatur, qoftë nga sondazhet apo nga hulumtimet e tjera, se po humb disa votues që nuk e dëshirojnë atë polarizim ekstrem”, ka thënë Maliqi.
Ndërkaq, njohësi i zhvillimeve politike, Artan Muhaxhiri, nuk sheh ndryshim thelbësor të metodave të Lëvizjes Vetëvendosje, por thekson se individë të caktuar brenda partisë përcjellin mesazhe të ndryshme për publikun.
“Vetëvendosje tashmë ka një strategji multidimensionale të mirënjohur. Brenda partisë, njerëz të ndryshëm përcjellin mesazhe të ndryshme për kategori të caktuara të elektoratit. Disa flasin në mënyrë më populiste dhe më agresive, ndërsa të tjerë në mënyrë më të matur dhe më të kulturuar, duke iu drejtuar në mënyrë specifike publikut. Në thelb, synimi është që të fitohen sa më shumë vota nga të gjitha anët”, është shprehur Muhaxheri.
Së fundmi, numri dy i Lëvizjes Vetëvendosje, Glauk Konjufca, ka shprehur qëndrime më të moderuara, në dallim nga disa bashkëpartiakë të tij, të cilët kanë përdorur gjuhë më të ashpër ndaj medieve dhe kundërshtarëve politikë.
Kujtojmë që pas fitores në zgjedhjet e 9 shkurtit, kryeministri në detyrë, Albin Kurti, i kishte quajtur hajvanë liderët partive opozitare.
