Kryeministri i Shqipërisë, Edi Rama deklaroi dje në Prishtinë se pa ish-presidentin e Kosovës, Ibrahim Rugova, kurrë nuk do të kishte UÇK, ndërsa eksperti i gjeopolitikës, Ilir Kulla vlerëson se pa marrëveshjen e Dejtonit s’do të kishte UÇK.
Kulla thekson se megjithatë Rugova kishte të drejtë që nuk donte ta fuste popullin e tij në luftë në fillim të viteve të 90-ta, sepse sipas tij, populli nuk ishte i përgatitur.
Më tej, eksperti cilëson se ish-presidenti Rugova ka pasur një rol të jashtëzakonshëm në krijimin e shtetit të Kosovës.
“Pa Dejton nuk do të kishte UÇK. Në momentin kur u bë Dejtoni dhe Kosova nuk u ulë në Dejton u pa e domosdoshme edhe nga Rugova që ishte presidenti i Kosovës në atë kohë, edhe nga qeveria e tij në mërgim po mbi të gjitha nga lëvizja popullore e Kosovës dhe nga organizatat që ishin ilegale në terren se pa kapur armët nuk do të kishte liri. Dhe mendoj që Rama ka qenë shumë i dedikuar në atë kohë që të merret me punët e veta, të pyes miqtë e vet për të ditur më shumë në raport me të. Rugova u prirë dhe kishte të drejtë që nuk donte të fuste popullin e vet në luftë në fillim të viteve 90-të sepse populli i vet nuk ishte i përgatitur për luftë. Ka një rol të jashtëzakonshëm Rugova në krijimin e shtetit të Kosovës dhe sidomos në ruajtjen e Kosovës nga makineria serbe, por pa UÇK-në ne nuk do të ishim këtu”, është shprehur ai në emisionin “MATRIX” në TËVË 1.
E kryeministri i Shqipërisë Edi Rama deklaratën e tij, e bëri gjatë qëndrimit të djeshëm në Kosovë, ku ishte pjesë e konferencës “Rugova dhe Perëndimi” të organizuar nga LDK në nder të 25 vjetorit të çlirimit të Kosovës.
“Në përvojën e tij që e krijonte përmes adresimeve të shumta, lind edhe një trashëgimi të vyer për brezat e ardhshëm dhe pikërisht nga këmbëngulja gërryese e përroit që rrodhi urtësisht u bë e mundur edhe hapja e shtratit ku mori jetë Ushtria Çlirimtare e Kosovës dhe sot është e qartë se kurrë se pa Ibrahim Rugovën nuk do të kishte pasur UÇK”, tha Rama. /teve1.info/
