Kandidati për deputet nga Lidhja Demokratike e Kosovës, Burim Meta, ka komentuar deklaratën e ministrit në detyrë, Faton Peci, i cili është shprehur i hapur për diskutime nëse ish-presidentja e Kosovës, Vjosa Osmani, do të dëshironte të rikthehej në partinë Guxo.
Në emisionin ‘Këndi i Debatit’ në Tëvë1, Meta e ka cilësuar qesharake deklaratën e Pecit, duke thënë se ai nuk ka as pozicion e as autoritet për t’i bërë ftesë Osmanit për rikthim në parti.
“Është shumë qesharake. Për mua deklarata e Pecit është shaka, nuk duhet të merrem me të. Ai nuk përfaqëson gjë… ai nuk është në pozicion për t’i bërë ftesë Osmanit për ndonjë parti”, ka deklaruar Meta.
Sipas tij, Peci nuk përfaqëson gjë dhe ka pasur vështirësi në karrierën e tij politike para se të bashkohej me Osmanin, e cila më pas ‘e ka emëruar ministër, ndërsa aktualisht ai mban pozitë drejtuese në Mitrovicë’.
“Ai nuk përfaqëson gjë, ai tërë jetën e tij ka pasur disfata në politikë derisa është bashkuar me Vjosa Osmanin, e cila e ka bërë ministër, dhe nga ai pozicion tashmë është kryetar në Mitrovicë”, ka përfunduar Meta./teve1.info./
