Në këto rrethana, erdhi në diskutim edhe mundësia që marrëveshja të arrihet tani dhe njohja të lihet për faza të më vonshme.
Ish-ambasadori i Kosovës në SHBA, Avni Spahiu thotë se nëse kjo marrëveshje arrihet Kosova duhet të ketë kujdes në atë se çfarë i ofrohet.
“Ne duhet të jemi shumë të kujdesshëm në këtë aspekt dhe me kujdesin më të madh të shikojmë se çfarë ofrojnë. Nëse ofrojnë diçka pozitive për ne, ndonjë njohje të re nga pesë vendet jo-njohëse, një vend në OKB dhe institucionet ndërkombëtare, atëherë mund të peshohej kjo çështje me më seriozitet”, tha Spahiu.
Ndërsa, ish ambasadori i Shqipërisë në OKB, Agim Nesho, në një prononcim për tëvë1 tha se kjo kronizë është paralajmërimi i fundit për Serbinë, në lidhje me orientimin e saj strategjik.
“Ky është një moment tepër pozitiv, sidomos për ne, për Kosovës, për arsye sepse, pavarësisht se korniza që i është shtruar liderëve të dy vendeve ka një sërë kushtesh dhe me të cilat mund të negociohet, ajo që është e rëndësishme dhe që ne jemi vënë në dije tashmë nga emisarët perëndimor është që ky do të jetë paralajmërimi i fundit i Serbisë. D.m.th tani jemi në një pozicion, ku Serbisë po i bëhet presioni për të bërë të mundur zgjidhjen të mos qëndroi në dy karrige”, vlerësoi Nesho.
Që nga fillimi i dialogut në vitin 2011 e deri më sot, ndërmjetësit ndërkombëtarë në vazhdimësi e kanë përmendur edhe opsionin e një marrëveshje, sipas së cilës, palët edhe nëse nuk vendosin njohje reciproke, pajtohen që të mos e pengojnë njëra-tjetrën në integrimin në organizata e mekanizma ndërkombëtarë.
Kronika e gazetarit Valmir Gallopeni.
