Në Francë sondazhet parashikuan se partia e ekstremit të djathtë “Tubimi Kombëtar” do të dalë fituese në zgjedhjet parlamentare.
Mirëpo Aleanca e krahut të majtë, Fronti i Ri Popullor, befasisht triumfoi në këto zgjedhje duke e lënë mbrapa edhe partinë e presidentit francez, Emmanuel Macron.
Udhëheqësi i të majtëve, Jean-Luc Melenchon, në të kaluarën kishte deklaruar se Kosova nuk ekziston dhe se sovraniteti i shtetit më të ri në Evropë, sipas tij është thjesht imagjinar.
Mirëpo profesori universitar, Valon Murtezaj, thotë se raportet mes Kosovës dhe Francës nuk do të ndryshojnë pavarësisht se kush do të udhëheqë shtetin francez.
“Duke pasur parasysh që Franca është njëra nga shtetet kryesore të Bashkimit Evropian dhe aktor i rëndësishëm në arenën ndërkombëtare, qeveria natyrisht se do të ketë një qasje serioze dhe se nuk duhet pritur që do të ketë ndryshim të qëndrimeve në raport me Kosovën dhe Ballkanin Perëndimor”, thotë ai
Kurse, eksperti i Marrëdhënieve Ndërkombëtare, Sadri Ramabaja, vlerëson se është lajm i mirë për Kosovën që krahu i ekstremit të djathtë në Francë ka dështuar në këto zgjedhje.
Mirëpo ai tregon se në disa çështje në Francë edhe ekstremi i majtë dhe ai i djathtë kanë pikëpamje të ngjashme.
“Edhe njëra palë edhe tjetra e shohin Kosovën si krijesë të Shteteve të Bashkuara të Amerikës. Të dyja palët nuk përfillin të gjitha rregullat e Bashkimit Evropian. Megjithatë brenda frontit të së majtës dominon një pjesë e cila është më racionale dhe prandaj kjo është më mirë në raport me Kosovën”, thotë ai.
Sipas të dhënave të Ministrisë së Brendshme, në Francë, e majta fitoi 182 ulëse, Aleanca Centriste e Macronit 168 dhe Tubimi Kombëtar i Marine Le Pen dhe aleatët 143.
Asnjëra nga këto parti nuk ka arritur të sigurojë shumicën në parlamentin francez që ka 577 ulëse.
