Nuk kanë mbetur edhe shumë javë deri në fillimin e vitit të ri shkollor.
Edhe kësaj radhe Ministria e Arsimit ka vendosur që të bëjë subvencionimin e teksteve e mjeteve shkollore njëjtë sikurse edhe në vitin e kaluar.
Por në rrjetet sociale prindërit kanë filluar planifikimet për sigurimin e librave të bëjnë në forma të tjera.
“Pershendetje!Pasi po afrohet viti shkollor, po fillojmi ti dhurojmi apo ti ndrrojmi librat! Mua me duhen librat e klase 9 ! I kam disa te klase 8 per ti dhurar apo ndrruar !”, shkruhet në një postim në rrjetet sociale.
E për ekspertin e arsimit,Rinor Qehaja është e pritshme një keqpërdorimi i tillë i parave nga prindërit.
“Keqpërdorimi i mjeteve për blerjen e teksteve shkollore nuk është befasi, por shpresoj ky numër të jetë i reduktuar dhe në asnjë moment të mos na shpërqendroj në qëllimin e mirë që ofron subvencionimi i drejtpërdrejt tek prindërit. Komuniteti i prindërve vet, komuniteti i shkollave, duhet të punojë në mirinformimin gjithashtu edhe MASHTI që rastet si kjo të mos na kthehen në normale”, vlerëson Qehaja.
E që rastet të tilla të mos përsëriten, nga Instituti Pedagogjik, kërkojnë që të merren veprime për parandalimin e keqpërdorimin e parave të ndara për blerjen e librave e mjeteve shkollore.
“Duhet të paraprimë një parandalimi veprimi të tillë nëse ekziston nuk duhet të lejohet të keqpërdoret se kjo është pare publike, është pare e jona një çfarë dy mënyre që është ajo. E dyta kjo është sanksionuar edhe me ligje që nëse dikush e keqpërdor këtë duhet të përgjigjet penalisht”, shprehet Ismet Potera.
Sipas njoftimit të MAShTI-t, për nxënësit e shkollave fillore nga klasa e 1 deri në klasën e 5-të do të ndahen nga 80 euro për çdo nxënës, ndërsa për nxënësit e arsimit në nivelin e mesëm të ulët, nga klasa e 6-të deri në klasën e 9-të, do të ndahen nga 110 euro.
Ministrja Nagavci, ka thënë që sipas të dhënave zyrtare, brenda 24 orëve kanë aplikuar gjithsej 60,244 prindër për subvencionim.
