Deputetja e Lëvizjes Vetëvendosje, Arjeta Fejza, ka deklaruar se nëse Gjykata Kushtetuese vendos që pas 8 gushtit duhet të vazhdohet me votim të hapur për kryetar të Kuvendit të Kosovës, Lëvizja Vetëvendosje do ta pranoj një aktgjykim të tillë.
Po ashtu, Fejza, në emisionin “Ditari” në Tëvë1, ka theksuar se përgjegjësia për respektimin e afatit të 26 korrikut i cili i obligonte deputetët e legjislaturës së nëntë që brenda 30 ditësh ta konstituonin Kuvendin, nuk ka qenë vetëm e LVV-së, por e të gjithë deputetëve.
“Ne sigurisht që e pranojmë aktgjykimin e Gjykatës Kushtetuese, ai është I obligueshëm për të gjithë ne. Ne e respektuam afatin e 26 korrikut, por afati nuk ishte për Vetëvendosjen, afati ishte për Kuvendin e Kosovës, pra për të gjithë deputetët. Mos të harrojmë që edhe gjatë kësaj kohe ne kemi provuar të bëjmë marrëveshje politike. Kemi pasur ofertë koalicioni për LDK-në e bisedime me Nismën në mënyrë që të zgjidhet kjo situatë, pra në të gjitha mundësitë e saj LVV-ja është munduar. Por, një element tjetër shumë I rëndësishëm është që aktgjykimi I Gjykatës Kushtetuese po aq përgjegjëse sa e bën partinë e parë I bën edhe partitë, përgjegjësia është e gjithë deputetëve”, ka thënë Fejza.
Ndryshe, më 26 qershor, Gjykata Kushtetuese e Kosovës vendosi se deputetët janë të obliguar që jo më vonë se 30 ditë të përfundojnë seancën konstituive të Kuvendit, duke zgjedhur kryetarin dhe nënkryetarët.
Mirëpo, pas mosrespektimit të këtij afati nga deputetët e zgjedhur të Kuvendit të Kosovës, më 24 korrik, Gjykata Kushtetuese vendosi masë të përkohshme ndaj veprimeve dhe vendimeve të deputetëve duke ndaluar çdo aktivitet parlamentar nga data 27 korrik deri më 8 gusht.
