E për rënien e tyre foli, vëllai i këtij të fundit, Naim Zhitia. Ai tha se angazhimi i Afrimit për të qenë në shërbim të popullit ka qenë që nga fëmijëria.
“Angazhimi i Afrimit për lirinë e Kosovës, ka qenë që nga fëmijëria. Lindja dhe angazhimi i Afrimit për të qenë në shërbim të popullit ka lindur nga familja. Afrimi në burg është dënuar 8 vite, mirëpo i ka mbajtur 4 vite”, rrëfeu Zhitia në emisionin “Infonata”.
Më tej, Zhitia tregoi se njëri nga bashkëpunëtorët e tyre ishte edhe Esat Brajshori, teksa shtoi se i tërë grupi përbëhej edhe nga 20 persona tjerë, e që të cilët të gjithë së bashku përfunduan në burg.
“Aktiviteti i tij është zbuluar në vrasjen e Rexhep Males dhe Nuhi Berishës në vitin 1984. Atëherë, ka pasur përpjekje të bashkimit të grupeve ilegale në Kosovë dhe pas tërë atyre përpjekjeve, u kanë rënë në gjurmë. Po atë natë janë marrë edhe vëllezërit Sejdi Veseli dhe Shemsi Veseli. Pastaj, si duket është bërë një listë me emrat e tyre dhe në këtë mënyrë janë zbuluar, por gjithmonë në bazë të njohurive që kemi”, shtoi tutje ai.
Ndërkaq, i pyetur se si e ka përjetuar familja e tyre rënien e Afrimit në burg, ai tha se ishin në dijeni që janë kundërshtarë dhe në sy të armikut.
“Nuk ka qenë aspak e lehtë për familjen tonë. Prandaj, kemi qenë të pajtuar me fakte të tilla. E dinim që pa lirinë e Kosovës do vazhdojë gjithmonë me burgosje e me vrasje”, theksoi Zhitia tutje në Tëvë1.
Kujtojmë se 33 vite më parë në lagjen Bregu i Diellit në Prishtinë, në luftime të pabarabarta me forcat e armikut, ranë heroikisht Afrim Zhitia dhe Fahri Fazliu.
Afrimi e Fahriu ranë në altarin e lirisë pas një rezistence disa orësh ndaj një rrethimi të hekurt të policisë dhe ushtrisë serbo-jugosllave.
Teksa sot për të nderuar heronjtë, janë mbajtur homazhe./Tëvë1.info.
