Perisa temperatura në një dhomë sillet rreth 30 gradë celsius punonjësit detyrohen të punojnë në kushte jo të mira.
E në këtë ambient punon Sadri Llumnica, punonjës në Prokurorinë e Apelit, i cili si pasojë e mungesës së oksigjenit në këtë objekt frikësohet se do ketë ndonjë problem shëndetësor.
“Në një takim që patëm na thanë që projekti kur është bë është bë me dy turbina, ku është dashur të bëhet me katër, tani meqë është me dy o do të jetë i gjithë objekti nxeht ose i gjithi ftohtë. Ne gjithmonë kemi kërku nga KPK dhe KGJK si dhe nga qeveria që urgjent të hapen dritaret”, thotë ai
Edhe Naim Rrustemi punonjës në Gjykatën Themelore, nuk po sheh kushte për të punuar.
“Kemi probleme shumë po ky është shfaqur më shumë në prokurorinë Themelore, ku vetëm brenda këtyre 2 muajve janë rreth 20 persona pra staf i prokurorisë të cilëve iu është deshtë trajtimi mjekësorë. Jo vetëm që nuk punon klima por edhe kur nuk ka ajër atëherë kurrfarë kushtesh nuk kemi për punë”.
Ndonëse një problem i tillë është tash e sa vite, kohëve të fundit është shfaqur dukshëm në objektin C. Se punonjësit veçse kanë filluar të kenë shqetësime shëndetësore, e konfirmon edhe zëdhënësja e Prokurorisë Themelore Laureta Ulaj.
“Gjatë periudhës së fundit është rënduar gjendja goxha shumë, kemi mungesë të theksuar të oksigjenit brenda objektit, e cila po shkakton pasoja në shëndet tek punonjësit e pallatit… Si pasojë e gjendjes së krijuar ne kemi marrë mbështetje nga KPK, ata gjatë ditës së premte kanë marrë vendim që të reduktohet stafi dhe aktivitetet brenda”, ka thënë Ulaj për Tëvë1.
Ndryshe, Televizioni ka insistuar për të marrë informacione nga Këshilli Gjyqësor dhe ai Prokurorial i Kosovës rreth kërkesës së punonjësve të Pallatit të Drejtësisë, por të njëjtit nuk kanë qenë të qasshëm.
Kronika e realizuar nga Lendrin Kodrolli
