Abdixhiku ka thënë se institucionet e vendit duhet t’i trajtojnë me ndjeshmëri të lartë rekomandimet e kërkesat të miqve ndërkombëtar.
Sipas tij, sjellja me arrogancë ndaj kërkesave të partnerëve dëmton interesat strategjike të vendit.
“Institucionet e vendit duhet t’i trajtojnë me ndjeshmëri të lartë rekomandimet dhe kërkesat e miqve tanë. Sjellja me arrogancë ndaj kërkesave të partnerëve tanë, dëmton interesat strategjike të vendit dhe mund të prodhojë pasoja afatgjata në rrugëtimin tonë politik. Siç na mëson e shkuara, këto marrëdhënie janë fundamentale për të fituar një pozicion më të mirë ndërkombëtar për vendin tonë si dhe për të ndjekur synimet tona strategjike”, tha ai.
Abdixhiku ka shtuar se është tejet brengosës fakti që Qeveria e ShBA-ve shprehet e zhgënjyer dhe e shqetësuar nga veprimet e Qeverisë së Kosovës.
“E drejta e zbatimit të ligjit në gjithë territorin e vendit, e ritheksuar në këto rekomandime ndërkombëtare, duhet të vlerësohet si garancë për vendin tonë. Kosova ka çdo të drejtë në vendosjen e ligjshmërisë; siç dhe e ka domosdoshmëri koordinimin me aleatë në ndjekjen e synimeve strategjike”, ka thënë Abdixhiku.
LDK njofton se, në Dragash, Abdixhiku dëgjoi nga afër për problemet e qytetarëve, si për rritjen e çmimeve, problemet në sektorin e energjisë, si dhe prezantoi konkretisht alternativën dhe programin praktik se si duhet të zgjidhen këto probleme.
Cikli debatues “LDK ju dëgjon” po vazhdon në secilin qytet të Kosovës dhe padyshim që zëri qytetarë, problemet dhe sfidat e tyre, do të adresohen në planin qeverisës të Lidhjes Demokratike të Kosovës.
