Kurti gjatë diskutimit të Shqyrtimi të Projektligjit mbi Ndarjet Buxhetore për Buxhetin e Republikës së Kosovës, njoftoi se të hyrat e vendit do të arrijnë vlerën prej 2 miliardë e 884 milionë euro.
“Buxheti për vitin 2023 do të jetë 3 miliardë e 212 milionë euro. Kemi ndarë 745 milionë euro në kategorinë paga dhe mëditje, 493 milionë euro në kategorinë mallra dhe shpenzime, 1 miliardë e 98 milionë euro në subvencione dhe transfere dhe 811 milionë euro në shpenzime kapitale”, deklaroi Kurti.
Më tej, kreu i ekzekutivit vlerësoi se sa i përket të hyrave dhe rritjes ekonomike, viti i kaluar ishte shumë i suksesshëm për Kosovën.
“Viti i kaluar ishte viti më i suksesshëm në historinë e shtetit tonë për sa i përket të hyrave dhe rritjes ekonomike. Ky vit me gjithë sfidat globale vazhdoi trendin pozitiv dhe na mundësoi të kemi një konsolidim të financave publike. Kjo na vendos në trajektore të mirë edhe për vitin e ardhshëm fiskal dhe si rezultat kemi një projeksion pozitiv nga Ministria e Financave, Punës dhe Transfereve”, tha tutje Kurti, raporton teve1.info.
Njëkohësisht, ai njoftoi se janë shtuar edhe 240 pozita të inspektorëve.
“Kjo nënkupton më shumë inspektorë të punës që të mbrohen të drejtat e punëtorit, më shumë inspektorë në shëndetësi që të sigurohet cilësia e shërbimeve, më shumë inspektorë të tregut që të sigurohet mbrojtja e konsumatorit dhe më shumë inspektorë tatimorë që të sigurohet mbledhja e tatimeve që mundëson ofrimin e shërbimeve më të mira publike”, u shpreh ai/Tëvë1.info/
