Kurti gjatë manifestimit tradicional informativo-kulturor me moto “Zbulimi i hershëm – mbijetesë” të organizuar nga Presidentja Vjosa Osmani, tha se edhe me vendimin e fundit të Qeverisë ëpr ndarjen e 4,2 milion eurove për barërat e listës esenciale, janë ndarë mjete për Klinikën e Onkologjisë.
“Solidariteti këtu është jetësor e mësim i madh për secilin prej nesh. Kjo na obligon më shumë që të merremi të gjithë e të ofrojmë përkrahjen tonë të pakursyer. Si Qeveri kemi siguruar buxhet të mjaftueshëm Për sigurimin e listës së barërave esenciale duke përfshirë ato për pacientët e prekur me kancer të gjrit. Në mbledhjen e fundit të Qeverisë kemi ndarë edhe 4,2 milion euros shtesë për këtë qëllim. Edhe në buxhetin për vitin 2023 do të ketë investime shtesë për diagnostikë por edhe materiale të veçanta për personat e prekur nga kanceri i gjirit”, tha Kurti.
Ai shtoi se gjatë gjithë muajit tetor ka pas aktivitete të ndryshme me qëllim vetëdijesimin e qytetarëve për parandalim të kësaj sëmundjeje.
Ndërsa, Kryetari i Shoqatës së Onkologëve, Arben Bislimi, tha se së bashku me Shoqatën “Jeta Vita”, e kanë vazhduar rrugëtimin edhe gjatë këtij tetori rozë.
“Objektivi ynë ishte përcjellja e informacionit, ndërgjegjësimi për kancerin e gjirit. Në 12 muaj jemi të mbështjellur rozë, çdo ditë në çdo kohë në shërbim të pacientëve tanë, falënderoj koleget nga Onkologjia për punën, nder për heroinat rozë, falënderim për pacientët sepse nuk ka më privilegj e krenari kur dikush ta beson gjënë më të çmueshme, shëndetin”, tha ai.
Kurse Nafije Latifi, themelues e shoqatës “Jeta Vita”, tha se në vitin 2006 kur është themeluar kjo shoqatë, tema e parandalimit të kancerit të gjirit ishte tabu në shoqërinë kosovare.
Ajo tha se janë bërë shumë fushata mediale, janë shpërndarë broshura fushata mediatike në sensibilizim të qytetarëve për mbrojtje nga kjo sëmundje.