Westerlund ka një përvojë të gjatë në diplomaci, ku ka dhënë kontribut të çmuar në vende si Iraku, Afganistani e Sudani.
Ai gjatë ditës së enjte mbajti një ligjëratë para studentëve të RIT Kosovo dhe rrëfeu disa prej eksperiencave të tij.
Westerlund, e njeh mirë situatën politike në Kosovë.
Ai kishte vizituar Kosovën edhe gjatë vitit 1999, ku vendi po kalonte nëpër në një periudhe të vështirë si pasojë e luftës.
“Unë isha këtu vite më parë dhe tani që u ktheva në Kosovë po ndjehem si në shtëpinë time. Çdo gjë duket më ndryshe tani kur e krahasoj me periudhën e vitit 1999. Gjatë asaj periudhe kemi parë makina te ushtarëve nëpër rrugë, tani është një situatë krejtësisht tjetër. Sot shoh shumë kafene, restorante, dhe njerëz të lumtur me atë se çfarë bëjnë. Natyrisht që unë shoh progres në Kosovë”, deklaroi ai.
Megjithatë, ambasadori shprehet i zhgënjyer se sa pak është bërë progres në raportet mes Kosovës dhe Serbisë, por shprehet më optimist për të ardhmen.
“Më vjen keq kur shoh që dialogu me Serbinë nuk ka shënuar shumë progres. Unë jam i befasuar që edhe pas 23 vjetësh, më duhet të eci mbi urën e Mitrovicës përsëri. Por le të shpresojmë që dialogu mes palëve të vazhdoj dhe të shënoj progres. Ne e përkrahim ndërmjetësimin e Bashkimit Evropian me emisarin për dialog, Miroslav Lajcak. Gjithashtu është për tu përshëndetur angazhimi që po bëhet nga i dërguari i SHBA-ve për Ballkanin Perëndimor, Gabriel Escobar. Ky proces po zgjatet shumë, duhet më shumë angazhim që në fund të arrihet diçka e madhe”, shtoi diplomati suedez.
Mes tjerash, ambasadori suedez foli edhe për rëndësinë që Kosova të zhvillohet aspektin ekonomik.
Sipas tij duhet më shumë punë për krijimin e industrive, ku edhe do të hapej rruga për punësimin e të rinjve.
Kronika e gazetarit Shpat Blakçori.