Sipas komunikatës së lëshuar nga Prokuroria Speciale, i pandehuri gjatë viteve 2020 dhe 2021 ka prodhuar dokumente false të vendeve të ndryshme si Kroaci, Itali etj. dhe i ka shitur për 100 deri 200 euro.
“Prokuroria Speciale njofton se i pandehuri F.K., gjatë vitit 2020 dhe 2021, me qëllim të përfitimit të drejtpërdrejtë apo të tërthortë të dobisë financiare apo dobisë tjetër pasurore, prodhon, furnizon, siguron ose posedon dokumente të rrejshme të udhëtimit ose të identifikimit me qëllim të kontrabandimit me migrantë, ashtu që për përftimin e shumave të ndryshme prej 100 – 200 euro për një dokument, si dhe ka vendosur aparaturat me të cilat ka bërë prodhimin e dokumenteve të falsifikuara, si pasaportë, letërnjoftim, patentë shofer si dhe dokumentacione tjera, të gjitha këto të vendeve të ndryshme, siç janë të Kroacisë dhe të Italisë, dokument këto të rrejshëm të udhëtimit ose të identifikimit, por me qëllim ishte kontrabandimi me migrantë”, thuhet në komunikatën e Prokurorisë.
Po ashtu sipas njoftimit të Prokurorisë Speciale të Kosovës, ndaj të pandehurit F.K., është vërtetuar dyshimi i bazuar se në punëtorinë e tij , (laborator) në lagjen Tophane, në Prishtinë, ka poseduar një revole ECOL special 99 Cal 9mm, me karikator dhe 2 fishekë, pa leje nga organi kompetent dhe në kundërshtim me Ligjin e zbatueshëm për armët.
“Me këto veprime i akuzuari F.K., ka kryer veprat penale “Kontrabandim me migrantë” nga neni 164 paragrafi 2 lidhur me paragrafin 1 të KPRK-së, dhe “Mbajtja në pronësi, kontroll ose posedim të paautorizuar të armëve” nga neni 366 paragrafi 1 i KPRK-së”.
