Policia ka identifikuar katër shtetas të huaj në pikë kalimin kufitar Hani i Elezit, të cilët janë gjetur të fshehur në rimorkion e një kamioni me targa të Maqedonisë së Veriut, me drejtues shtetas i Maqedonisë së Veriut.
“Me datë 25.10.2022, në kuadër të parandalimit të aktiviteteve kriminale dhe dukurive të tjera negative që bien ndesh me ligjin, Policia e Kosovës, respektivisht njësia policore në pikë kalimin kufitar – Hani i Elezit kanë identifikuar 4 shtetas të huaj të cilët janë gjetur të fshehur në rimorkion e një kamioni me targa të Maqedonisë së Veriut, me drejtues shtetas i Maqedonisë së Veriut. Në lidhje me rastin është konsultuar prokurori i shtetit me udhëzim të së cilit janë duke vazhduar të gjitha procedurat e nevojshme policore” thuhet në komunikatë.
Po ashtu, Policia ka pranuar informata se nga territori i Serbisë ka hyrë një veturë e dyshuar me mallra të kontrabanduara, ku gjatë kontrollimit të veturës janë gjetur 676 pako me barna të llojeve të ndryshme, raporton teve1.info
“Pas pranimit të informacioneve njësitë patrulluese kompetente kanë ndërmarrë veprime për ndalim të mjetit të dyshuar me ç’rast kanë vendosur një pikë kontrolli vëzhguese, ku si rezultat është arritur që të ndalohet automjeti i dyshuar, me targa serbe, i cili kishte hyrë në Kosovë përmes rrugëve ilegale. Gjatë kontrollimit të veturës janë gjetur gjithsej 676 pako me barna të llojeve të ndryshme”, thuhet në komunikatë.
Lidhur me këtë rast është konsultuar prokurori me urdhër të së cilit personi i dyshuar është ndaluar për 48 orë, ndërsa malli dhe vetura janë sekuestruar për procedura të mëtejme.
