I ndarë në 17 nene, dokumenti jep detaje për përcaktimin politik-ligjor, organet, objektivat, marrëdhëniet me autoritetet qendrore.
Draft-statuti e përkufizon atë si një “entitet të ligjshëm” në pajtueshmëri me marrëveshjen e parë në Bruksel, për parimet e asociacionit.
Asociacioni që fillimisht përbëhet nga 10 komuna, por që mund të zgjerohet, përbëhet nga Asambleja, Presidenti, zëvendësi i tij, Këshilli, Bordi dhe Zyra e Apelit. E ka stemën dhe flamurin.
Ky Asociacion kërkohet të ushtrojë mbikëqyrje të plotë në fushën e arsimit, kujdesit shëndetësor, zhvillimit ekonomik, kurse në katër komunat veriore lejohen të propozojnë komandantin rajonal të policisë.
Komunat me shumicë serbe sipas këtij drafti do të kenë mundësinë të bashkëpunojnë me autoritetet e Serbisë, madje edhe të përfitojnë grante nga ky shtet.
Avokati Skender Musa thotë se një pikë me rëndësi në këtë draft është ajo e cila e fuqizon autonominë e komunave të Asociacionit.
“ Në rast të mosmarrëveshjeve mes Qeverisë së Kosovës dhe Bashkësisë parashihet që Qeveria e Kosovës ka të drejtë ta dërgojë në Gjykatën Kushtetuese dhe jo të vendosë si një autoritet qendror lidhur me anulimin e një vendimi të paligjshëm të marrë nga niveli lokal”, deklaroi Musa
E për njohësin e marrëdhënieve ndërkombëtare, Albinot Maloku, përcaktimi i Asociacionit si “entitet legal” nuk është në frymën e Kushtetutës.
“Veç definicioni entitet legal me kompetencat e veta që po i ndërlidh që është mundu me dal një nivel i ndërmjetëm, kjo po lë hapësirë me krijua një mekanizëm vendimmarrës të ri brenda sistemit politik në vend”, u shpreh Maloku.
Për këtë draft jozyrtar ka reaguar edhe Qeveria e Kosovës.
Zëdhënësi Përparim Kryeziu thotë se nuk lëkundën nga qëndrimet e mëhershme se në Kosovë nuk mund të ketë asociacion një etnik.
“Qëndrimi jonë për Asociacionin e Komunave me Shumicë Serbe është i njohur, i qartë dhe i njëjtë. Asociacione që karakter themeltar kanë etninë bien ndesh me Kushtetutën e Republikës sonë dhe vet karakterit e shtetit tonë. Për më tepër, komunitetet jo-shumicë kenë nevojë për integrim, jo izolim. Sa i përket dokumentit që ka qarkulluar sot në media, ai përveçse draft, është pa autor. Në anën tjetër ne jemi Qeveri e Republikës së Kosovës që kemi kushtetutshmëri dhe ligje të cilat i mbrojmë dhe respektojmë”, tha Kryeziu.
Tëvë1 ka kontaktuar qeverinë gjermane rreth këtij drafti.
Në pyetjen nëse ky draft ka ardhur nga Bundestagu gjerman, nuk ka pasur përgjigje të drejtpërdrejtë.
“Gjermania dhe Franca po japin mbështetjen e tyre të plotë për dialogun e udhëhequr nga BE-ja ndërmjet Kosovës dhe Serbisë, të ndihmuar nga EUSR Miroslav Lajcak. Është bindja jonë e fortë se çështjet politike në lidhje me rrugën drejt normalizimit të plotë duhet të trajtohen në një mënyrë më vendimtare dhe të shpejtë, në mënyrë që të mos ketë vend për përshkallëzim në terren. Në takimet e fundit të nivelit të lartë kjo është nënvizuar dhe propozimet për këtë qëllim janë diskutuar në mënyrë konfidenciale. Këto diskutime po vazhdojnë”, thuhet nw përgjigjen e Qeverisw gjermane.
Së fundmi, emisarët evropianë e amerikanë për dialogun, kanë shtuar presionin që Kosova të prezantoj sa më parë një statut për Asociacionin.
Kronika e gazetarit Gojart Jashari
