Në seancën parlamentare Murati theksoi dy prej çështjeve që ai i cilësoi si faktorë për rritjen e çmimeve të produkteve.
“Rritja e çmimeve ka dy faktorë kryesorë kontribues. E para është importi pra problem i parë është rritja e çmimit të importit që është rritur në nivelin global dhe mbi të cilin Qeveria nuk ka kontroll. Problemi i dytë spekulimi nga tregtarët brenda vendit, sepse është shfrytëzuar situata nga shumë tregtarë, rritja e marzhës në mënyrë anormale në vend”, tha ai.
Kurse sa i përket marzhës së fitimit në produkte bazë ai tha se çmimi i importit të vajit që kalon në kufi është 1 euro e 40 cent, teksa sipas tij, ne markete i njëjti shitet me çmim 2 euro e 60 cent.
“Ta marrim shembull çmimin e vajit. Çmimi i vajit sipas ASK-së, është 2 e 65 cent për litër. A e dini sa është çmimi i importit, çmimi mesatar i importit që një litër vaj ka hy në kufi ditëve të fundit është 1 e 40 cent, pra kostoja e importit është 1 e 40 cent, e shitja në raft është 2 e 60 cent. Marzha e fitimit është 90 për qind dhe neve na thuhet që nuk është problemi te marzha por te TVSH-ja ,që është 8 për qind, e cila siç e kemi parë në rastin e gastronomisë nuk reflekton te çmimi te konsumatori dhe te qytetari”, tha ai./teve1.info./
