Gaxherri tha se lufta e krijuar në Ukrainë është në favor të Kosovës, prandaj sipas saj, është e pafalshme në qoftë se një momentum i tillë nuk shfrytëzohet.
“Ne duhet të insistojmë që me Serbinë ta mbyllim dialogun, nuk mund t’i detyrojmë që të na njohin, duhet t’u japim argumente botës e sidomos miqve tanë, që Kosova është e gatshme ta mbyllë dialogun me Serbinë. Mirëpo, për fat të mirë në këtë vit jemi në një momentum të ri pozitiv për Republikën e Kosovës. Tani me situatën gjeopolitike, duke përfshirë këtu luftën në Ukrainë, është krijuar një momentum i mirë për vendin. Këtë momentum nuk na falet nëse e humbim. Gjithashtu, të gjithë e dimë që kjo situatë është në favor të Kosovës”, tha Gaxherri e ftuar në emisionin “Ditari” në Tëvë1.
Tutje, ajo tha se Lidhja Demokratike e Kosovës është shumë e shqetësuar për faktin se kryeministri Kurti nuk është në nivel të detyrës në këtë aspekt.
Gjithashtu, deklaroi se Presidenti i Amerikës, Joe Biden, është i gatshëm për të ndihmuar në përfundimin e këtij procesi, madje tha se ka dërguar letra me kërkesë që Kosova dhe Serbia të dialogojnë mes vete./Tëvë1.info/