E ftuar në emisionin “Ditari”, Haliti tha se dokumentimi i rasteve të dhunës seksuale si proces nuk ka qenë fare i lehtë, por që sipas saj, prej fillimit kanë qenë të përgatitur se si proces do të jetë mjaft i vështirë.
“Nuk ka qenë proces i lehtë sepse nuk kemi pasur standarde të caktuara paraprakisht dhe është dashur që prej fillimit të përgatitemi për një proces të tillë, sepse është proces mjaft i ndjeshëm dhe sfidues sepse janë kategori të ndjeshme. Me ligj duhet të mbrohen të dhënat e tyre, konfidencialiteti si dhe çështjet tjera që lidhen me jetën personale. Kështu që është dashur të krijojmë rregullore të veçanta për procedurën e marrjes së të dhënave, përpunimin e tyre, ruajtjes, krijimin e data bazës së veçantë e cila pra është unike sepse nuk ka qasje në internet, duhet të kijohen kushte fizike për ruajtjen dhe menaxhimin e të dhënave“, ka thënë ajo.
Sipas Halitit, deri më tani si Qendër kanë grumbulluar të dhënat për 900 raste të dhunës seksuale, teksa tha se si proces do të vazhdojë edhe në vitet në vijim.
“Mandej është krijuar edhe platforma online e cila përmes faqes zyrtare të organizatës sonë i publikon të dhënat e herëpashershme të grumbulluara. Deri më tani i kemi grumbulluar të dhënat për 900 raste, mirëpo jemi ende në proces të regjistrimit të rasteve të reja që besoj që si proces do të vazhdon edhe në vitet në vijim”, tha ajo.
Teksa tha se si komponentë të veçantë si Qendër kanë trajtuar rastet që kanë pësuar shtatzani nga dhunimi, e që siç tha ajo janë gjithsej 35 raste të deklaruara që kanë mbetur shtatzënë si pasojë e dhunimit gjatë luftës së fundit në Kosovë.
“Prej rasteve që i kemi të dokumentuara deri më tani 35 raste kanë deklaruar që kanë mbetur shtatzënë si pasojë e dhunimit gjatë luftës. Dhe në bazë të këtyre të dhënave të dokumentuara prej 35 rasteve që kanë qenë shtatzënë vetëm 6 e kanë mbajtur fëmiun, e kanë lindë dhe për të njëjtin janë përkujdesur. Kurse rastet e tjera në momentin që e kanë marrë vesh që janë shtatzënë e kanë abortuar, sepse nuk kanë dëshiruar që t’i lindin”, shtoi ajo./teve1.info./