Dhjetëra projektligje i shkojnë në çdo seancë për votim deputetëve të Kuvendit.
Por për shkak të mungesës së kuorumit, shumë prej tyre nuk hidhen fare në votim.
E kjo dukuri ia ka tërhequr vëmendjen edhe Komisionit Evropian.
Në raportin e saj theksohet se Puna e Kuvendit ndikohet negativisht nga vështirësitë në arritjen e kuorumit vendimmarrës ndonëse qeveria mbështetet nga një shumicë e fortë.
Sipas KE-së menaxhimi i dobët i agjendës legjislative dhe abstenimi i opozitës pengojnë miratimin e legjislacionit.
Deputeti i pushtetit Visar Korenica për këtë fajin ia hedh kolegëve opozitarë teksa arsyeton mungesat e kolegëve të tij.
“Disa prej deputetëve ndodh që janë nëpër udhëtime të ndryshme, në angazhime përmes komisioneve apo të Grupeve të Miqësisë ku ftohen nëpër takime të ndryshme dhe këtu mund të ketë ndonjë vakuum. Në shumicën e rasteve ka qenë opozita ajo që e ka sabotu apo ka dalë jashtë Kuvendit, për me pamundësu kalimin e ligjeve”, tha ai.
Megjithatë, Blerta Deliu nga PDK vlerëson se pushteti nuk e ka bërë asnjë lëvizje që do t’i kontribuonte konsensusit dhe vazhdon të jetë e mbyllur ndaj opozitës kur është fjala te ligjet.
“Për dallim prej mazhorancave apo shumicave tjera parlamentare kjo shumicë nuk e ka problemin e numrave. Tash nëse i mungon koordinimi, nëse nuk është e përgatitur që të angazhohet seriozisht që ligjet që sillen në Kuvend të miratohen dhe të marrin mbështetjen e tyre, nuk do të duhej të kërkohej nga opozita diçka që nuk e bën kjo shumicë parlamentare”, tha Deliu.
Analisti Fidan Ukaj thotë se përgjegjësinë kryesore në këtë mes e ka kryeparlamentari Glauk Konjufca.
“Në raport thuhet edhe keqmenaxhim i institucionit të parlamentit që i bie përgjegjësi drejtpërsëdrejti i z.Konjufca dhe mund t’i atribuohet si dështim mosmundësia e thirrjes dhe prurjes së deputetëve të VV për të kaluar ligjet”, bëri të ditur Ukaj.
Sipas një monitorimi nga Instituti Demokratik i Kosovës, nga janari deri në fund të qershorit, nga 45 seanca 23 kanë dështuar si pasojë e mungesës së kuorumit. E gjatë kësaj periudhe, deputetët kanë munguar në seanca plot 699 herë.
Kronika e realizuar nga gazetari Gojart Jashari.
