Përveç kësaj, Tahiri tha se përmes këtij raporti gjithashtu u konstatua se në Kosovë nuk ka progres në fushat kyçe, duke përfshirë këtu ekonominë, drejtësinë e sigurinë.
“Komisioni Evropian përmes raportit të progresit të vitit 2022 e konfirmon se në Kosovë nuk ka progres në fushat kyçe të vlerësimit për procesin e Integrimit Evropian të Kosovës. Pra, nuk ka zhvillim në sektorin e ekonomisë, shëndetësisë, në drejtësi e në siguri. Më e rëndësishmja është dështimi i madh në shëndetësi, ata kanë konfirmuar situatën e rëndë për qytetarët e Kosovës në sektorin e shëndetësisë. Raporti konstaton në formë kritike se buxheti i shëndetësisë për vitin 2022 u zvogëlua për 14.6 përqind nga Qeveria e Kosovës”, deklaroi Tahiri.
Tutje, Tahiri shtoi se nga raporti i Komisionit Evropian, fushë e dështimit u konstatua edhe Reforma Legjislative, teksa kanë vlerësuar se Kosova është në fazat e hershme të arritjes.
“Një fushë tjetër e dështimit është Reforma Legjislative, ata konfirmuan se edhe pse Qeveria e ka shumicën në Kuvend, ajo dështon për të bërë kuorum. Në fushat tepër të rëndësishme si drejtësia, lufta kundër krimit e korrupsionit, zhvillimi ekonomik, raporti i Komisonit Evropian nuk konstaton progres, por vlerëson se Kosova është në fazat e hershme të arritjes”, tha më tej Tahiri.
Sipas Tahirit, ky konfirmim e vërteton faktin se shpejtësia e ndryshimit për të cilën ka nevojë Kosova, nuk po ndodhë në mënyrë të duhur.
Teksa shtoi se qytetarët e vendit meritojnë më mirë se kjo Qeverisje aktuale./Tëvë1.info/
