Trajneri Ilir Daja dhe futbollisti Qëndrim Zyba kanë qenë sot të dy në konferencë për shtyp, për sfidën me Sivassporin në kuadër të fazës grupore të Grupit G në Ligën e Konferencës.
Ndonëse në fitoren e portokallizinjëve në Turqi kishte mungesa të konsiderushëm të lojtarëve, Daja konfirmoi se edhe në ndeshjen që do të zhvillohet në “Fadil Vokrri” do të ketë mungesa. Përveç kapitenit Edvin Kuç që ende nuk është rikuperuar 100%, i lënduar është lojtari Veton Tusha që nuk do të jetë i gatshëm për ndeshjen e së enjtës.
“Kapiteni Kuç nuk do të jetë i gatshëm, ka disa ditë që ka filluar vrapimet, por nuk ka bërë stërvitje me grupin. Ai do të jetë në pankinë, edhe pse nuk do të luajë me 99%. Rikthimi i Astrit Thaqit është një bonus për ne, por kemi të dëmtuar edhe Veton Tushën për nesër”, tha Daja.
Ballkani dhe Sivasspori do të ballafaqohen të enjtën në stadiumin “Fadil Vokrri” në Prishtinë, nga ora 21:00. /Tëvë1/
