Ata thonë se kallëzimin penal e kanë dorëzuar lidhur me lejimin e mbajtjes së “Festivalit Sunnyhill” më 4-7 gusht 2022 pa vendim/pëlqim në parkun e mbrojtur të Gërmisë.
“Qytetarët Aktivë, konsiderojnë që zyrtarët me veprimet dhe mosveprimet e tyre kanë kryer vepër penale të degradimit ose shkatërrimit të mjedisit (neni 338 i Kodit Penal), lejimit të kundërligjshëm të instalimeve që ndotin mjedisin (neni 340 i Kodit Penal), si dhe të keqpërdorimit të pozitës apo autoritetit zyrtar të sanksionuar me nenin 414 të Kodit Penal të Republikës së Kosovës”, thuhet në njoftimin e qytetarëve aktivë.
Sipas njoftimit, kallëzimi penal është dorëzuar kundër, Alban Zogaj – nënkryetar – Komuna e Prishtinës, Ilirik Musliu – drejtor i drejtorisë për Shërbime Publike, Mbrojtje dhe Shpëtim – Komuna e Prishtinës, Habib Qorri – udhëheqës i sektorit për shërbime publike – Komuna e Prishtinës, Sabri Gashi – zyrtar për hapësira publike – Komuna e Prishtinës. /teve1.info/
