Paris Saint-Germaini ka barazuar 1:1 në shtëpi me Benfican të martën në kuadër të Grupit H të Ligës së Kampionëve.
Kylian Mbappe në minutën e 40-të realizoi nga penalltia për epërsinë e Parisit, ndërsa barazoi Joao Mario për Benfican, po ashtu nga penalltia, në minutën e 60-të.
Pas 4 xhirove Parisi zë vendin e parë në grup me 8 pikë sa i ka edhe Benfica që është e dyta. Juventusi është i treti me 3 pikë, ndërsa Maccabi Haifa zë vendin e katërt po ashtu me tri pikë. Maccabi të martën mposhti Juventusin 2:0.
Ndërsa me barazim është mbyllur edhe sfida mes Borussia Dortmundi e Sevillas, në xhiron e katërt të fazës së grupeve të Ligës së Kampionëve.
Dortmundi dhe Sevilla e mbyllën sfidën me shifra 1:1. Tianguy Nianzou shënoi për Sevillan në minutën e 18-të, ndërsa barazoi Jude Bellingham për Dortmundin në minutën e 35-të.
Te Sevilla nga minuta e 59-të u aktivizua Adnan Januzaj. Barazimi në këtë ndeshje ia ka mundësuar Manchester Cityt që ta sigurojë kalimin në fazën nokaut të Ligës së Kampionëve. City barazoi të martën 0:0 në udhëtim me Copenhagenin.
Pas 4 ndeshjeve në Grupin G, City kryeson me 10 pikë, tri më tepër se Dortmundi. Sevilla është e treta me 2 pikë, sa i ka edhe Copenhageni që mban vendin e katërt.
