Shefi i Grupit Parlamentar të AAK-së, Besnik Tahiri, e propozoi Rezolutën për daljen nga gjendja e krijuar me greva dhe mosekzekutimin e pagave për grevistët në sektorin e arsimit parauniversitar në Kosovë.
Ai tha se është absurde të aludohet se po ruhet buxheti i Kosovës dhe dinjiteti i shtetit dhe shoqërisë, duke e shkelur dinjitetin e një kategorie tjetër, siç janë mësimdhënësit.
“A keni menduar si mund t’i përgjigjen mësuesit fëmijëve të tyre për shkurtesat buxhetore që ata i kanë në familje? Apo duhet t’u thonë se ne gabuam, se ne nuk dimë e Qeveria din”, tha Tahiri.
Ai i tha ministrit Hekuran Murati se po shkakton kriza të panevojshme të cilat sipas Tahirit, nuk i nevojiten Kosovës e as vet ministrit.
“I nderuar ministër Murati, ju dhe Qeveria keni dështuar që paranë publike ta trajtoni si mundësi dhe potencial për t’i dhënë jo vetëm stimulim dhe rritje ekonomike por njëkohësisht për t’i adresuar çështjet që po i adreson secila Qeveri dhe secili ministër në krizë gjithandej BE-së”, tha Tahiri.
Sipas tij, vetëm 11 për qind të buxhetit të shtetit është shpenzuar derisa 2 ministri kanë zero shpenzime.
“Është marrëzi që duke u thirr në këtë ligj të ndalohet paga gjatë një greve të ligjshme. Qeveria nuk është punëdhënës i personelit parauniversitar arsimor. Me ligjin për qeverisje lokale, me Kushtetutën që i ndan pushtetet këtë përgjegjësi ia ka deleguar komunave, kontrata nënshkruhet me arsimin komunal dhe këtu është vija llogaridhënëse”, tha Tahiri.
Sipas Tahirit me mosekzekutimin e pagave është shkelur edhe ligji kundër diskriminimit pasi zyrtarëve të administratës të cilët kanë mbajtur grevë njëlloj si mësimdhënësit, iu kanë paguar rrogat për muajin shtator.
“Përgjegjësia është individuale, nuk është kolektive. Arsyeja pse jemi në këtë moment është pse tri herë është shty ligji i pagave”, tha Tahiri.
Interpelanca me ministrin e Financave Hekuran Murati është iniciuar nga shtatë deputetë të Aleancës për Ardhmërinë e Kosovës.
