Kjo nismë është propozim i presidentit francez, Emmanuel Macron. Ai si iniciues, para takimit tregoi edhe njëherë për qëllimet e këtij samiti.
“Ne të gjithë ndajmë të njëjtën hapësirë, shpesh për më tepër të njëjtën histori dhe kemi thirrjen për të shkruar së bashku të ardhmen tonë, ky është objektivi i këtij Komunitet”, deklaroi Macron.
Kjo ide, shpesh është komentuar edhe si zëvendësim i Bashkimit Evropian. Por, kancelari gjerman, Olaf Scholz, tha se ky organizim nuk do të krijojë ndonjë mekanizëm të ri.
“Është e rëndësishme që sulmi rus ndaj Ukrainës të mos pranohet, ne nuk pranojmë që pjesë të fqinjit tonë të aneksohen. Nuk ka të bëjë me krijimin e një institucioni të ri që ka administratë dhe burokraci”, u shpreh Scholz.
E Presidenti i Këshillit Evropian, Charles Michel, tha se ndajmë një kontinent, të njëjtat sfida dhe se duhet të përpiqemi të sjellim stabilitet, siguri e paqe.
Republika e Kosovës në këtë samit u përfaqësua nga presidentja e vendit Vjosa Osmani, e cila para mediave tha se kjo nismë i mundëson trajtim të barabartë të gjitha shteteve.
“Ka mundësi të barabartë të dëgjohet zëri ynë, idetë dhe veprimet për t’u përballur me këto sfida. Po marr pjesë në këtë mbledhje dhe do të kem edhe takime bilaterale me liderët e Evropës. Ajo që po përballemi është sfidë e madhe, por nëse qëndrojmë të bashkuar, do të jemi në gjendje të kemi sukses’, tha Osmani.
Ndërsa, kryeministri i Shqipërisë Edi Rama, tha se pret që pas këtij takimi, kjo nismë të jetë shumë aktive dhe të mos ketë takime vetëm në kohë krizash.
“Shpresoj se nuk do të ketë nevojë për një krizë tjetër për të pasur një tjetër takim të tillë. Por nga ky takim ne do të vazhdojmë dhe do të ndërtojmë diçka shumë të rëndësishme për të gjithë komunitetin e madh evropian të vendeve dhe njerëzve”, deklaroi Rama.
Pas takimit kryesor, liderët pjesëmarrës realizuan një fotografi të përbashkët.
Në bazë të agjendës, në këtë takim të parë, është diskutuar mbi temat, si paqja dhe siguria, situata ekonomike, energjia dhe klima, si dhe migrimi dhe lëvizja.
Kronika e gazetarit Valmir Gallopeni.
