Materialet e domosdoshme për të ndërtuar një objekt, nuk do t’i gjeni në treg me çmimin e njëjtë si disa vite më parë.
Kjo pasi inflacionit të përhapur kudo nuk i kanë shpëtuar as importuesit vendorë të produkteve ndërtimore.
Kësisoj përmes një ligji Qeveria synon t’i kompensojë kompanitë e ndërtimit që kanë të lidhura kontrata me institucionet publike.
Sipas ligjit kompensimi nuk mund të kalojë 20% të faturës bazë.
“20 % e rritjes së vlerës së kontratës nuk është e mjaftueshme po thojmë në shumicën e rasteve për arsye se produktet bazë sidomos të pjesës së ndërtimit: hekuri, cimenta, nafti e fuqia punëtore kanë një rritje pothuajse 100 %”, ka thënë Jahir Morina – kryetar i sektorit të ndërtuesve në Aleancën e Bizneseve të Kosovës
Sipas Morinës punët edhe ashtu po kryhen me vonesa për shkak të rritjes së çmimit të produkteve.
“Ato vetëm se pothuajse janë ndërpre, pothuajse janë në proces të një situate jo të lakmueshme, janë me vonesa, të gjitha kontratat që janë bërë për ekzekutimin e punëve të caktuara janë me vonesa kanë pas një ngecje dhe nis nuk ka një subvencionim të saktë të gjitha kompanitë do të jenë në humbje”,shprehet Morina.
Ndërkaq nga Demokracia plus, përmes një përgjigje me shkrim thonë se përveç kontratave të punës, qeveria duhet t’i subvencionojë edhe lloje tjera të kontratës.
“Projektligji duhet të përfshijë edhe kontrata të natyrave të tjera, si p.sh kontrata për shërbime e furnizim, çmimet e të cilave janë prekur nga inflacioni dhe operatorët ekonomikë e kanë të vështirë apo pamundur t’i realizojnë me çmimet e kontraktuara”
Një kompani e ndërtimit i ka thënë televizionit prapa kamerave se thesi i çimentos është rritur nga 4 euro e gjysmë në 7 e gjysmë, blloku nga 22 në 38 cent, teksa çmimi i hekurit nga 53 cent në 1 euro e 20 për kilogram.
Kronika e realizuar nga Gojart Jashari