Deputetja e Vetëvendosjes, Arbëreshë Kryeziu, thotë se institucionet janë duke punuar vazhdimisht për arritjen e liberalizimit të vizave.
“Kemi parë disponim të mirë tek shtetet anëtare për ta përkrahur këtë proces që ka nisur tashmë vite më parë dhe me sa duket po shkojmë edhe drejtë finalizimit të tij. … Kemi parë që ekziston një disponim i mirë, por megjithatë mbetet të shihet se cili do të jetë vendimi përfundimtar. Ajo çfarë mund të them unë sot edhe për të cilën mund ta sigurojë secilin qytetarë të Republikës së Kosovës, është që, qoftë nga ana jonë si deputet, qoftë nga ana e Qeverisë si ekzekutiv, po punohet jashtëzakonisht shumë që ky proces të marr epilog njëherë e mirë”, tha Kryeziu.
Optimiste se Kosova më në fund do të marrë liberalizimin e vizave shprehet edhe deputetja e Partisë Demokratike, Blerta Deliu. Ajo thotë se kushtet janë plotësuar që moti.
“Kriteret i kanë përmbushur Qeveritë paraprake dhe kanë shtyrë agjenda, unë jam shumë optimiste dhe dua të besoj që për 10 ditë më në fund do të kemi sinjalet e para pozitive për të hyrë në një proces të liberalizimit dhe pastaj kjo merr kohë deri në përmbushje të disa teknikaliteteve në mes të dy shteteve, por unë jam e bindur që më në fund vet Bashkimi Evropian do të konfirmojë atë që e ka konfirmuar tash e sa kohë”, u shpreh ajo.
Një delegacion i Kuvendit të Kosovës në javën e kaluar ka vizituar institucionet e Bashkimit Evropian. E nga kjo vizitë deputetja e LDK-së, Rrezarta Krasniqi, thotë se kanë marrë mbështetje të madhe për heqjen e vizave.
“Jo të gjithë deputetët, duke u nisur nga zëvendëspresidenti i Parlamentit Evropian, kanë thënë që ju kemi borxh që nga 2018-a, sepse Kosova që në 2018 i ka plotësuar të gjitha kriteret për liberalizimin e vizave, është një padrejtësi e madhe që i është bërë popullit tonë sepse jemi i vetmi vend në rajon të cilit na mungon ky proces dhe kemi plotësuar kritere më shumë se të gjitha vendet e tjera të rajonit të cilat e kanë përfunduar këtë proces. d.m.th kemi marr mbështetje të parezervë në lidhje me liberalizimin e vizave”, deklaroi Krasniqi.
Liberalizimi i vizave për Kosovën po bëhet një realitet sidomos pas zbutjes së qëndrimeve kundërshtuese nga Franca e Holanda.
Kronika e gazetarit Valmir Galloponi.