I doli në krah Kosovës, në ditët më të errëta të saj. Andaj konsiderohet si një hero nga populli shqiptar. Ishte në dorën e tij, si komandant dhe gjeneral i NATO-s ta ndalte ushtrinë serbo-jugosllave, që po kryente krime mizore ndaj popullit shqiptar.
Prandaj edhe sot e kësaj dite, uniforma e Gjeneralit Wesley Clark ruhet me kujdes në muzeun kombëtar të Kosovës.
Aty ruhen edhe predhat që u përdorën nga Aleanca më e fuqishme ushtarake në botë për çlirimin e Kosovës nga okupatori serb.
Ndonëse kanë kaluar mbi 20 vjet që nga përfundimi i luftës, Wesley Clark vazhdon të jetë lidhur ngushtë me Kosovën.
Ai thotë për tëvë1 se bota është trazuar nga Presidenti Rus, Vladimir Putin.
Clark sheh ngjashmëri mes tij edhe ish-kasapit të Ballkanit, Slobodan Miloseviq.
Gjenarali në pension nuk e përjashton mundësinë që Putin të përdor edhe armë bërthamore.
“Bota nuk është e sigurt, po e shohim se çfarë po ndodh me luftën në Ukrainë. Vladimir Putin nuk po kthehet prapa. Ai po kërkon që qytetarët rusë të sakrifikojnë për të. Nuk e përjashtoj mundësinë që ai të përdorë armë nukleare. Këto janë krimet më mizorë që po shohim në Shekullin 21. Ushtria e Jugosllavisë ishte e fortë kur NATO ndërhyri në Kosovë, por për dallim nga Rusia që ka ushtri të dobët, këta të fundit megjithatë kanë armë bërthamore. Neve na u deshën 78 ditë që ta ndalim Millosheviqin, ndërsa kjo luftë në Ukrainë po duket shumë e gjatë, dhe përfundimi nuk është afër”, u shpreh Clark.
Gjenerali ushtarak ka folur edhe për çështjen e dialogut mes Kosovës dhe Serbisë. Ai thotë se emërimi i Christopher Hill si ambasador në Beograd, lë të kuptojë se situata është shumë serioze. Megjithatë ai nuk sheh rrezik të luftës në Ballkan, për shkak të fuqisë se madhe që ka NATO.
“Kemi një ambasador të madh, ai është Christopher Hill, i cili e kupton shumë mirë situatën mes Kosovës dhe Serbisë. Ai është në vendin dhe momentin e duhur. Gjithashtu edhe në Kosovë, Shtetet e Bashkuara të Amerikës kanë emëruar një ambasador të fortë. Pra duhet të vazhdoj dialogu me Serbinë, edhe nëse ka shumë dallime e probleme. Fjalët që po përdoren për luftë nuk më shqetësojnë, sepse i di kapacitetet e NATO-s”, shtoi ai.
Mes tjerash, Wesley Clark, e sheh si të domosdoshme që Kosova të ushtrojë sovranitet të plotë edhe në veri të vendit.
Kronika e gazetarit, Shpat Blakçori