Jasharaj në konferencën për media, tha se uron që kjo kohë të shfrytëzohet nga Qeveria e të mos ndodhin greva si kjo e tanishmja, sepse siç thotë ai, janari i vitit 2023 vjen shpejt.
“Qeveria dhe opinioni le ta dinë se greva nuk po mbyllet por po pezullohet deri në janarin e vitit 2023, bazuar në vullnetin e deklaruar të anëtarësisë edhe pse duhet të bëhem si zakonisht i sinqertë, rezultatet e deklarimeve u panë se janë me diferencë jo shumë të madhe, pro pezullimit dhe jo pezullimit. Urojmë që kjo kohë të shfrytëzohet nga Qeveria për dialog të mirfilltë sepse janari i vitit 2023 vjen shpejt, por nuk është mirë të ndodhin greva si kjo e tanishmja”, ka deklaruar ai.
Ai po ashtu, kërkon nga Qeveria që të takohen për dialog të sinqertë, në realizimin e kërkesave të SBASHK-ut.
“Nga qeveria kërkojmë që të takohemi në dialog të sinqertë për të realizuar kërkesat legjitime të anëtarësisë e që janë bërë publike. Urojë që Qeveria dhe Parlamenti ta mbajnë fjalën për ligjin e pagave, për ndryshimin e ligjit e skemave pensionale e sidomos lidhur me kriterin diskriminues për 15 vite kontributdhënëse. Urojë që punohet bashkërisht ligji për sigurimet shëndetësore. Urojë që tri palët në këshillin ekonomik social ta nënshkruajnë marrëveshjen kolektive”, ka deklaruar Jasharaj.
Ndërkaq, kryetari i BSPK-së, Atdhe Hykolli tha se 24 shoqata kanë qenë për pezullim të grevës, ndërsa një shoqatë ishte për vazhdimin e saj.
“Greva nuk ishte dhe nuk do të jetë akt personal i askujt, as individuale as i individëve por i organizimit sindikal. Greva është e përcaktuar në Kushtetutën e Republikës së Kosovës dhe mbrohet me aktet e së drejtës ndërkombëtare, siç është i paracaktuar edhe aktiviteti sindikal e mbi të gjitha me dinjitetin personal e kolektiv që rregullohen me ligje të veçanta. 24 shoqata ishin për pezullim, ndërsa 1 shoqatë për vazhdimin e grevës”, theksoi ai.
Sipas Hykollit, pagat për grevistët janë proceduar nga Ministria e Financave dhe deri të hënën pritet që të dalin në llogaritë e gjithë punonjësve. /teve1.info/
Lexo edhe:
