Gjatë vitit 2021, sipas Agjencisë së Statistikave të Kosovës numri i të vdekurve nga sëmundjet ngjitëse ishte 1 mijë e 690 persona, ku numri më i madh i të vdekurve ishte nga COVID-19 me 1 mijë e 655 raste.
Numri i personelit mjekësor, i angazhuar në QKUK dhe në spitalet e përgjithshme, që trajtuan pacientët me COVID-19 ishte 1 mijë e 951 persona.
Sipas ASK-së, numri i institucioneve private shëndetësore të licencuara është mbi 1 mijë e 800, prej të cilave 29 spitale kurse tjerat ambulanca, poliklinika, laboratorë, kabinete etj.
“Sipas rezultateve të dala nga ky publikim, numri i përgjithshëm i të punësuarve në shëndetësi në sektorin publik, në vitin 2021, ishte 13 mijë e 448 të punësuar, prej tyre 2 mijë e 776 mjekë specialistë, 7 mijë e 707 infermierë dhe 2 mijë e 323 staf jo-mjekësorë”, thuhet në komunikatën e ASK-së.
Sipas këtij njoftimi, në vitin 2021, në Qendrat e Mjekësisë Familjare ishin mbi 3 milion vizita mjekësore, ndërkaq në Spitalet e Përgjithshme kishte afër 320 mijë ditë shërimi.
Gjatë kësaj periudhe në Qendrën Klinike Universitare të Kosovës (QKUK) kanë qenë mbi 408 mijë ditë shërimi me mbi 90 mijë pacientë të shtrirë dhe mbi 15 mijë të operuar.
Sipas ASK-së, numri më i madh i të prekurve me sëmundje malinje dhe beninje i përkiste grup-moshës 65-69 vjeçare, me gjithsej 474 raste.
“Numri i dializave të realizuara gjatë vitit 2021, në të gjitha spitalet publike të Kosovës ishte 117 mijë e 431, ndërsa numri i shërbimeve nga qendrat profesionale të shëndetit mendor ishte 110 mijë e 512.
Numri i të prekurve me TBC ishte 447 persona, prej tyre: 192 ishin femra dhe 255 meshkuj”, thuhet në komunikatë.