Sipas një komunikate për medie nga Zyra e Kryeministrit, Kurti gjatë këtij forumi ka shprehur falënderim për mbështetjet, siç thuhet në komunikatë, të vazhdueshme që i ka dhënë Japonia Kosovës në zhvillimin e shumë sektorëve me rëndësi.
Ndërkohë, sipas njoftimit për medie, Kurti i ka njoftuar përfaqësuesit e bizneseve edhe me potencialin që e ka Kosova për investitorë të huaj.
“Përfaqësuesit e bizneseve në këtë forum, u njoftuan me zhvillimet e fundit në Kosovë dhe me indikatorët më të fundit ekonomik dhe demokratik të vendit.
Kryeministri Kurti dhe ministri Murati, prezantuan para tyre karakteristikat kryesore të vendit dhe pse ato e bëjnë Kosovën vend tërheqës për investime të huaja.
Ata ndër të tjera veçuan pozitën gjeografike të Kosovës, popullsinë e re dhe fuqinë punëtore të re dhe të talentuar.
Kryeministri Kurti i ftoi bizneset që ta vizitojnë Kosovën dhe të hulumtojnë mundësitë e investimeve që vendi ynë ofron”, thuhet në komunikatë.
Kurti në këtë forum mori pjesë gjatë ditës së fundit të qëndrimit të tij në Japoni, ku ishte i pranishëm edhe ministri i Financave, Punës dhe Transfereve, Hekuran Murati dhe Ambasadori i Kosovës në Japoni, Sabri Kiçmari.
