Hill të hënën në një deklarim për medie tha se Serbia duhet të shpjegojë se çfarë firmosi me Rusinë.
“Në këtë moment, askush nuk duhet të nënshkruajë asgjë me Rusinë dhe shumë pak po e bëjnë. Përveç atyre rekrutëve të varfër që po mobilizohen për të shkuar në luftë. Është e vështirë për ne ta kuptojmë, por duam të dëgjojmë një shpjegim se për çfarë bëhet fjalë”, tha Hill, përcjell mediumi serb N1 të hënën.
Kjo marrëveshje e cila sipas Serbisë nuk ka të bëjë me sigurinë, por me koordinim të politikave të jashtme mes dy vendeve, nxiti reagime në Kosovë por edhe nga disa zyrtarë në BE.
Raportuesja për Kosovën në Parlamentin Evropian, Viola von Cramon, e quajti skandal të rëndë këtë marrëveshje.
“Ky është një skandal i rëndë. Në mes të luftës së furishme Serbia nënshkruan planin për bashkëpunimin e ardhshëm me agresorin. Ose ndoshta është thjesht një sinjal për ne që të ngrijmë bisedimet e anëtarësimit pasi hyrja në BE nuk kalon përmes Moskës”, ka shkruar ajo./teve1.info/
