Kanë përfunduar tri sfidat e fundit të xhiros së gjashtë në Superligën e Kosovës në futboll.
Drita ka arritur si mysafire ta fitoj kryendeshjen, ku gjilanasit mposhtën të dielën në udhëtim skuadrën kampione të Kosovës, Ballkanin, me rezultatin 2:0.
Ndeshja u zhvillua në stadiumin “Rexhep Rexhepi” në Drenas. Marko Simonovski e shënoi golin e parë në minutën e 31-të, ndërsa për 2:0 u përkujdes Besnik Krasniqi, që shënoi nga penalltia në minutën e 59-të.
Me këtë fitore, Drita shkon në kuotën e 11 pikëve në pesë ndeshje të zhvilluara. Ballkani mbetet me nëntë pikë në katër ndeshje.
Ndërsa Gjilani dhe Prishtina kanë barazuar në ndeshjën e zhvilluar në stadiumin me bar sintetik në Gjilan e cila u mbyll, 1:1.
Elton Cale shënoi për vendësit pesë minuta para se skuadrat të shkonin në pushim. Barazimi erdhi në minutën e 67-të. Kreshnik Uka realizoi nga penalltia.
Pas gjashtë ndeshjeve të luajtura, Gjilani mbetet lider në tabelë me 14 pikë. Prishtina në vendin e katërt ka tetë pikë në pesë ndeshje të luajtura.
Kurse befasia e javës erdhi nga Ferizaji që mposhti Llapin e Tahir Batatinës me rezultat të ngushtë 2-1. Astrit Fazliu dhe Ramush Ramadani në minutat 29′ dhe 42′ i dhanë epërsinë prej dy golash në pjesën e parë Ferizajt
Në pjesën e dytë Llapi sulmoi me të gjitha forcat, por nuk arriti të shënoi më shumë se një gol që erdhi nga Ilir Krasniqi e që nuk mjaftoi për të marrë pikë në shtëpi.
