Meta në emisionin “Këndi i Debatit” deklaroi se “Guxo” ka pasur rekomandime edhe nga përfaqësuesit e KQZ-së që të ketë dy udhëheqës.
“Gjatë procesit të mbarëvajtjes së Kuvendit tonë kemi pasur edhe përfaqësues të KQZ-së brenda Kuvendit dhe gjithashtu edhe kolegët tanë të cilët janë marrë me organizimin e këtij Kuvendi kanë qenë në kontakt të vazhdueshme me përfaqësues e të KQZ-së dhe në fund kemi ardhur në përfundim dhe kështu kemi pasur edhe rekomandimet nga përfaqësuesit e KQZ-së që të kemi dy bashkudhëheqës të partisë “Guxo””, tha ai.
Tutje deputeti i Guxo tha se partia e tij do ta zhvillojë veprimtarinë në bazë të ligjit në fuqi teksa theksoi se ky model i udhëheqjes nga dy kryetarë të jetë shembull edhe për partitë tjera.
“Ne fushëveprimtarinë tonë do ta bëjmë komfrom legjislaturës në fuqi, qenka ligji që nga viti 2008 që mendoj që edhe ky ligj do të duhet të reformohet në KQZ për shkak se kërkesat dhe proceset demokratike po zhvillohen më tutje. Ne treguam se po dojmë ta bëjmë një praktikë kolegiale të qeverisjes sikur më parë ndoshta me suksesin që do ta paraqesë kjo formë e udhëheqjes së një partie politike, do të jetë shembull edhe për partitë e tjera”, shtoi Meta.
Ndërkohë para një dite, Donika Gërvalla e Faton Peci u zgjodhën në krye të partisë Guxo./Teve1.info/
