Në komunikatën e lëshuar për medie, Policia e Kosovës njofton se më datën 5 shtator 2022, në Republikën e Kosovës do të qëndrojë për vizitë Kryeministrja e Serbisë, Ana Brnabiç, së bashku me një delegacion shoqërues.
“Policia e Kosovës, gjatë kësaj vizite e cila realizohet në Mitrovicën e Veriut, do të kujdeset për ofrimin e sigurisë dhe mirëmbajtjen e rendit e qetësisë publike.
Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore), të disa segmenteve rrugore ku pritet të kalojë eskorta, si dhe në lokacione të caktuara ku parashihen të realizohen aktivitete”, thuhet në njoftim.
Ndërsa sipas njoftimit, Policia do të kujdeset për riorientim të trafikut për rrugë alternative, pas mbylljes së atyre ku do të kaloj eskorta e kryeministres serbe.
“Njëkohësisht për të mundësuar qarkullimin dhe riorientimin e trafikut në rrugë alternative në lokacionet ku pritet të kalojë eskorta do të angazhohen zyrtarë policorë të njësiteve relevante, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik”,thuhet në njoftimin e Policisë.