Pajaziti në emisionin “Ditari” tha se PDK nuk e pa të arsyeshme të bëhej pjesë e një populizmi, sepse siç tha ai, ky takim ishte një ritrajtim i marrëveshjes së viteve të mëparshme.
“Nuk është se ishte një ftesë para një faze të dialogut, nuk është se ishte një ftesë për përcaktimin tonë të përbashkët për arritjen e një marrëveshje përfundimtare. Pra kishte të bënte me një fazë në të cilën nuk ishim fare të informuar. Kishte të bënte me një populizëm ekstrem dhe një ritrajtim të një marrëveshje të viteve të mëparshme. Pra nuk është se PDK e mendoi të arsyeshme të bëhej pjesë e një lloj populizmi, e një lloj lansimi të një rezultati fiktiv i cili nuk është se do t’i bënte mirë opinionit tonë ose nuk është se do t’i bënte mirë si të thuash nxjerrjes së një informate e cila nuk është se është një rezultat që do të duhet të vinte para qytetarëve tash”, tha Pajaziti.
Ai theksoi nuk ka nevojë që ndërmjetësit ndërkombëtarë ta njoftojnë opozitën me vendimet që mirren në Bruksel, por sipas tij, kryeministri Kurti duhet të bashkëpunojë me opozitën në mënyrë më serioze.
“Qëndrimi i PDK-së, është tërheqje e vërejtjes për kryeministrin Kurti që ta trajtojë mirë opozitën ose të bashkëpunojë me opozitën në mënyrë më serioze, më të mirëfilltë për sa i përket këtij procesi. Ky është procesi më serioz që ka vendi ynë dhe nuk mendoj që duhet ndërmjetësit ndërkombëtarë ta njoftojnë opozitën se çfarë po ndodh në Bruksel e çfarë po ndodh në takimet me palën serbe”, shtoi ai.
Kurse sot kryeministri i vendit, Albin Kurti u takua me dy krerët e partive opozitare në Kosovë, Lumir Abdixhikun e LDK-së dhe Ramush Haradinajn e AAK-së, ndërkohë që Memli Krasniqi i PDK-së e ka refuzuar ftesën e Kurtit për takim lidhur me dialogun me Serbinë. /teve1.info./