Në një komunikatë për media LDK-ja ka thënë se kriza energjetike po shkon duke u thelluar, dhe sipas tyre si pasojë e keqmenaxhimit të Qeverisë po bien blloqet e KEK-ut në mënyrë të vazhdueshme, raporton teve1.info
“Si pasojë e keqmenaxhimit të Qeverisë po bien edhe blloqet e KEK-ut në mënyrë të vazhdueshme, me ç’rast po bie edhe mirëqenia e qytetarëve deri në limitet e mbijetesës. Ende pa u rregulluar Blloku A5, bie Blloku A3, duke bërë kështu që KEK-u të mos prodhojë as gjysmën e kapacitetit të tij, ku 530 MËh janë jashtë prodhimit. Në këtë kontekst, i bëjmë thirrje Qeverisë që të pranoj planin tonë dhjetëpikësh dhe t’i shpëtoj qytetarët, sepse me qasjen e saj të deritanishme po e shpien vendin drejt katastrofës energjetike”, thuhet në komunikatë.
Tutje në komunikatë janë përmendur edhe reduktimet, ku thuhet se reduktimet e energjisë po ndodhin verës, gjersa ditët më të ftofta po vijnë.
“Ka kaluar më shumë se një vit nga kriza energjetike, ndërsa Qeveria kishte kohë të mjaftueshme të përgatitej që dimri që po vjen të jetë më lehtë i përballueshëm për qytetarët, mirëpo ajo dështoi në ditët më të nxehta të vitit – ditët e verës, ku konsumi i energjisë është më i ulët. LDK i kërkon Qeverisë që të marrë masa dhe të pranojë planin dhjetëpikësh për përballjen me krizën energjetike”, thuhet ndër të tjerash në komunikatë.
Këto janë dhjetë pikat e planit të propozuara nga LDK-ja:
- Pagesa e menjëhershme e subvencioneve të premtuara prej 90 milionë euro për çmimin e energjisë elektrike.
- Riparimi i Bllokut A5 i Termocentralit Kosova A.
3. Krijimi i mekanizmave për furnizim me burime alternative për ngrohje me çmime të përballueshme për qytetarët.
4. Përgatitja e planit të efiçiencës dhe kursimit të energjisë.
5. Negocimi i kontratave afatgjate për furnizim me energji.
6.Zbritja e TVSH-së nga 8% në 0% për faturat e energjisë.
7. Krijimi i subvencioneve të reja për qytetarët dhe bizneset.
8. Largimi i tarifave diskriminuese të ZRrE-së.
9.Themelimi i bursës së përbashkët për energji Kosovë-Shqipëri.
10.Përgatitja e Strategjisë afatmesme për rritjen e kapaciteteve gjeneruese me gaz dhe energji alternative.
