Paguhen nga kuleta e shtetit të Kosovës. Por deputetët e Listës Serbe, subjektit të vetëm politik që përfaqëson serbët në institucionet e vendit, vazhdimisht kërcënojnë me largim nga to.
Së fundmi, kryetari i kësaj liste, Goran Rakiq tha se nëse nuk ka kompromis mes Kosovës e Serbisë për targat e dokumentet e hyrje-daljes, do të dalin nga legjislativi, ekzekutivi e gjyqësori.
Nga Instituti Demokratik i Kosovës vlerësojnë se largimi potencial i kësaj liste nga Kuvendi pamundëson ndryshimet kushtetuese.
“Kosova duhet ta përfundojë edhe procesin e Vetting’ut dhe sipas rekomandimeve të Venecias duhet bërë ndryshime kushtetuese në vend dhe normalisht që është e nevojshme që ky proces të realizohet. Dhe çdo ndryshim kushtetues në Kosovë siç e dini nevojitet edhe vota e komuniteteve joshumicë, në këtë rast atij serb”, tha Vullnet Bugaqku, hulumtues i lartë në KDI.
Sipas Bugaqkut, pa Listën Serbe nuk mund të miratohen ose ndryshohen as ligjet me interes vital, siç mund të jetë ai për arsimin apo për liritë fetare.
Por, dalja e Listës Serbe, për dallim nga Kuvendi, në Qeveri duket se nuk e pengon fare punën.
“Në parim nuk rrezikohet puna dhe funksionaliteti i Qeverisë për shkak se ata nuk kanë votë që e bllokojnë punën e Qeverisë së Kosovës. Ata ministra edhe në të kaluarën janë zëvendësu ose funksionin e tyre e kanë kry zëvendësministrat”, shtoi ai.
Për njohësin e zhvillimeve politike, Fidan Ukaj, nëse Lista Serbe vazhdon me kto sjellje atëherë Qeveria duhet të marrë masa.
“Ata ministra që janë destruktivë, bojkotues, mohues ne duhet t’i largojmë nga qeverisja. Edhe në këtë rast z.Rakiq me veprimet e tina dhe ministrat që vijnë nga kjo listë nëse vazhdojn me veprime destruktive, kryeministri i Kosovës duhet t’i largojë nga Qeveria”, deklaroi ai.
Lista Serbe në Qeveri përfaqësohet me ministrin për Kthim dhe Komunitete, Goran Rakiq, kurse në Kuvend me 10 deputetë.
Kronika e gazetarit Gojart Jashari.
